ازمة غريبة بين البانيا وايطاليا بسباب الماكلة. 4 سياح كلاو فمطعم وسلتو وحكومتهم خلصات عليهم 68 دولار

حادثة غريبة وقعات بين ايطاليا والبانيا خدات ابعاد فشي شكل. الدولة الايطالية براسها خلصات فاكتورة عشا 4 الايطاليين كلاو فمطعم ب"بيرات" الألبانية. هاد الشي جا بعد ما صورات كاميرا هاد السياح اللي كلاو وشبعو وسلتو بلا ما يخلصو.
الفيديو تشهر والاعلام الالباني حيح والقضية وصلات لايطاليا اللي تحرجات لان هاد اللي وقع تزامن مع زيارة رئيسة الحكومة الايطالية جيورجيا ميلوني لهاد الدولة. رئيس الحكومة الالباني جبد الموضوع مع زعيمة اليمين المتطرف ورئيسة حكومة ايطاليا. حجرها.
ميلوني طلبات من السفارة الايطالية فتيرانا تخلص الفاكتورة. وخرج بيان رسمي كيقول باللي خلصو 68 دولار وباللي الطاليانيين كيحتارمو القواعد وكيخلصو باش كيستهلكو وباللي السفارة تتمنى ما يتكررش هاد الشي مستقبلا.
وزير الفلاحة الايطالي عطى تصريح لرويترز وصف فيه هادوك السلاتة ب"المخادعين" وقال باللي ما يمكنش يسمح ل"لحفنة من المخادعين يتسببو فاخراج امة من المحترمين"