إسرائيل كتستعد تستقبل رئيس مجلس المستشارين فأول زيارة لمسؤول فالأغلبية الحكومية: واش ميارة غيستفد من التجربة الديمقراطية الإسرائيلية لي كتربط المسؤولية بالمحاسبة فأبسط الخروقات وتسجن الوزراء ورئيس الحكومة والمسؤولين؟

النعم ميارة رئيس مجلس المستشارين غايمشي الخميس المقبل، إلى إسرائيل، فأول زيارة لمسؤول في التحالف الحكومي لإسرائيل منذ تطبيع العلاقات بين البلدين.
زيارة المسؤول المغربي لدولة إسرائيل جات من بعد زيارة رئيس الكنيست امير اوحنا للبرلمان المغربي قبل أشهر قليلة. ولكن السياق ديالو بصفتو رئيسا لبرلمان البحر الأبيض المتوسط.
ميارة غايدير زيارة لمنطقة الشرق الأوسط على رأس وفد برلماني يضم أعضاء من مكتب هاد المنظمة البرلمانية الإقليمية. وغايمشي لفلسطين والأردن ويتلاقا مع مسؤولين فيها كما غايتلاقا مع مسؤولين إسرائيليين.
غير هو ميارة معروف بفضايحو، منها فاش حط صاحبو حفظي من الباطرونا فمنصب المجلس الأعلى للتعليم بلاصت المراة النقابية الاستقلالية، عطاه صفة نقابي واخا هو باطرون.
ماشي غير هادشي، آخر فضايح هاد الاستقلالي هي صفقة مع حيفظي عن فريق الباطرونا فمجلس المستشارين. دار صفقة باش يتصايب المجلس واللي كيتراوح ما بين 2 و3 مليار، دازت بشكل غير قانوني. حيفظي هو المحاسب فالمجلس. دوز ليه الصفقة بلا ما تعرض على اللجنة 13 كيف كيقول القانون واللي كتكون خارج مكتب المجلس. علاش ما عرضهاش على هاد اللجنة؟ حقاش مازال ما تشكلاتش أصلا. فضيحة ففضيحة.
وشفتو قبل كيفاش ميارة اللي زعيم كذلك الاتحاد العام للشغالين بالمغرب دخل فلائحة نقابتو هاد حيفظي. نقابة العمال كدخل ممثل الباطرونا. كلشي عبثي وصافي.
دبا هاد الزيارة لي غادي يدير ميارة لإسرائيل واش غادي تخليه يفيق ويستفد من ديمقراطيتها ومن الخبرة فمحاربة الفساد، خصوصا فمحاكمة الوزراء الفاسدين ومنهم رئيس الوزراء السابق ايهود أولمرت لي تحكم بست سنوات بتهم تلقي هدايا ورشاوى.
من الحاجات لي ممكن تفيد ميارة فالزيارة ديالو هي ربط المسؤولية بالمحاسبة ويستفد من الإيجابيات لي فهاد الدولة لي عندها كذلك سلبيات، واللي كيرفضها المغرب خصوصا فاش كادير هجوم على الفلسطينيين كتلقا المغرب أول الدول اللي كيدينها. والرباط واضحة وضد أي اعتداءات ضد المقدسيين.
ميارة فضايحو مكتساليش غير فمجلس المستشارين، بانت كذلك فالنقابة وكيفاش نقابتو دايرا صفقة مع شركات والسانديكات فعدد من القطاعات، خصوصا ديال التدبير المفوض لي عليها تقارير رسمية كحلة بحال ديال تقارير المجلس الأعلى للحسابات.
ميارة فهاد الرحلة لإسرائيل غايدوز من الأدرن وفلسطين، وغايدار له حفل عشاء.
رئيس الكنيست أمير أوحانا رحب بهاد الزيارة وقال "زيارة غير مسبوقة تشهد على المرحلة الجديدة التي نشأت في العلاقات الإسرائيلية المغربية". وأضاف: أهنئ صديقي رئيس مجلس المستشارين ميارة لكونه أول رمز للأغلبية يقوم بزيارة تاريخية للكنيست. ليس هناك ما هو مطلوب أكثر من أن يتم التعبير عن العلاقة الدافئة بين الشعبين في علاقة دافئة بين البرلمانيين الذين يمثلونهم.