غرائب فرقة الباطرونا فمجلس المستشارين: كيقودها حيفضي رجل البصري اللي باغي يرجع البرلمان خدمتو والمرأة الوحيدة ربحات سباب سنها وولد الرشيد محرم عليهم لعيون

البارح دارت انتخابات اختيار اعضاء مجلس المستشارين 120. منها تم اختيار 8 ديال الباطرونا وهم نايلة التازي ومهدي كريم ويوسف العلوي والطيب الموساوي ومحمد العموري واحمد الصغير ومحمد رضى لحميني وعبد الاله حيفضي.
هادو هما اللي غاديين يديرو فريق الباطرونا. غير هو كاين مشكل وممكن جدا يوليو 7 اعضاء. السبب هو ان الطيب الموساوي عن جهة لعيون كيمثل حزب الاستقلال. تعاود فيلم مجلس المستشارين ل2016 اللي كان ديك الساعة ممثل الباطرونا عن العيون هو محمد سالم بنمسعود ولكن فضل يمشي مع حزب الاستقلال اللي دارو. هاد الجهة حافظات علي خصوصيتها الغريبة وهي ان الباطرونا ما عندهاش بلاصتها. فهاد الجهة كاين غير واحد اللي كيختار شكون ممثل النقابة = النعم ميارة عن الاتحاد العام للشغالين بالمغرب= وممثل الباطرونا =الطيب الموساوي=. هنا ما كيحكمش فيهم الاتحاد العام للمقاولات بالمغرب =الباطرونا=
من الامور المثيرة فهاد الانتخابات هو عودة 3 كانو فالمجلس السابق وهم حيفظي ومهدي كريم ونايلة التازي. حتى النقابات اللي كيكون عندهم اعضاء فمجلس المستشارين دايرين ميثاق اخلاقي فيه ان اللي ترشح مرة ما يبقاش يعاود. دابا هادو كيدافعو على مصالح الباطرونا وعاودو للمرة الثانية. هاد الشي خاصو يتغير. الباطرونا يدوز مرة وحدة فقط ويخلي بلاصتو لغيرو
كذلك فهاد الاسماء رجع رجل البصري اللي كان مدير ديوانو شي ايام وجرا عليه. رجع يهيمن على الباطرونا وغالبا الي كان شي فريق ديالهم غادي ياخدو. يتعلق الامر بعبد الاه حيفظي. هاد الشخص رباه البصري باش يعرف ديما يجي اللول فالانتخابات. هيمن. كيفاش الباطرونا باغية تعطي وجه جديد وكتخدم بكمامر قديمة. بكمامر الماضي. غريب امثال هاد حيفظي باقيين مستمرين فما كيسميوه العهد الجديد.
المرأة الوحيدة فهاد اللائحة اللي كانت ابعد بكثير عن المناصفة هي نايلة التازي. حتى هي كانت غادية تفشل تدخل لمجلس النواب. البارح جابت 60 صوت بحالها بحال مرشح الباطرونا عن مراكش. ربحات نايلة التازي بسنها. باش كيتساواو الاصوات كياخدها اصغرهم سنا.
الباطرونا مازال بعيدة بزاف ماشي على المناصفة وغير على كوطا تضمن تمثلية فحدود 20 بالمائة للمرأة المقاولة.