"الجن" تشد..لابيجي شدو أشهر شفار وسط الرباط اللي كينهب الديور والفيلات الواعرين

وأخيرا الشفار الملقب ب"الجن" تشد، وذلك بعدما عاشت ساكنة كل من حي المحيط والقببيات في الشهور الاخيرة نوع من الرعب والخوف بسباب هاد الشفار للي مكيخليش الآثار فاش كيضرب شي شفرة.
الشفار "الجن"، حسب معطيات "كود"، كيختار ديما الديور الواعرين أو كيعزل غير الذهب او الفلوس ولكن رغم انه معروف بالجن او كان كيضن راسو معمرو يوصلوا ليه البوليس.
بل وصل الامر عند سكان لوصيون فاش بدات كتدور الهضرة ناضو الناس او كل واحد ولا كيدير كاميرة فالباب او كاين اللي بدل لقفل واللي جاب باب ديال الحديد.
هادشي للي طرا فلوصيون، دفع برجال الحموشي يخدمو بالسرعة القصوى باش يجبدو هاد الجن، بحيث أن لابيجي ديال المحيط كيبحتوا او كيسولوا كبير او صغير او معاهوم التصويرة ديال الجن .
بالفعل توصلوا ليه او شدوه فسلا او هنا بينو كعادتهم أن الشرطة القضائية ديال حي المحيط ساهمت من جديد في الامن والامان للساكنة وخاصة اصحاب الشقق المسروقة فرحو لما استدعتهم الشرطة للتعرف على الشفار الجن او يتعرفوا على المسروقات ديالهوم.