السيد كان غادي يحماق.. ميريكاني وصلو بروسي بمليار ونص بسباب مخالفة ديال السرعة

صدمة كبيرة عاشها واحد الميريكاني، وهو كيشوف الورقة د الغرامة لي وصلاتو بسباب واحد المخالفة دارها في الطريق بسبب السرعة.
على حساب ماقالت بزاف د الصحف في ميريكان، فهاد السيد لي سميتو "كونور كاتو"، تصدم بعدما شاف أن الغرامة لي خاص يخلص هي 1,4 مليون دولار، يعني تقريبا مليار ونصف سنتيم.
المخالفة لي دار هاد خونا هي أنه كان ماشي بسرعة 145 كلم في الساعة في واحد الطريق لي ماخاصش يفوت فيها 90 كلم في الساعة.
الصحافة ديال ميريكان كتقول أن هاد الغرامة ماشي حقيقية، وإنما كتديرها السلطات باش تفرض عليه يجي للمحكمة ويتقدم قدام القاضي وهو لي غادي يقوليه الغرامة الحقيقية.