العمل كايشبه لاغاني البروباگاندا الستالينية يامات الاتحاد السوفياتي ! ايه المغاربة كايحبو ملكهم و كايغنيو عليه و لكن راه ماشي بالاقحام ديال اسم الملك و تصوريتو بهاد الشكل فأي عمل فني غادي تبانو كاتبغيوه! بغيوه بالخدمة المتقونة و الابداع الجميل

الزهر المكوز ديالي خلاني نصبح على واحد التخربيقة سميتها “ملحمة أبطال” فاليوتوب فيها بزاف ديال الممثلين و المغنيين و الرياضيين المغاربة كايغنيو زعما تشجيعا منهم لملف احتضان المغرب لكاس العالم.
أغنية رديئة طبعا ! و كلمات ماعند باباهم تا معنى ! لا تليق باش تتسمى “ملحمة” أصلا! كلمة ” ملحمة” كبيرة كبيرة كبيرة عليها بزاف كاتبين بلي الفكرة من وراها هي ” آجي نبانو راحنا خدامين” و صافي.
سعيد الناصري لي هادي شي شهورا كان واقف كايتشكى قدام البرلمان من الرداءة فالتلفزة المغربية ( و نسا الأعمال ديالو فيها) صدق هوا المنتج ديال هاد العمل لي أقل مايمكن القول انه أردئ من الرداءة.
بلا ماندوي على التصوير الهاوي و داك المونطاج لي باين مخدون بويندوز موفي مايكر، و داك لاريير بلون لي فكرني فالتصاور لي كنا كانتصورو فلابوراطوار فالتسعينات مع المشموم ديال الورد د ميكا !
العمل كايشبه لاغاني البروباگاندا الستالينية يامات الاتحاد السوفياتي ! ايه المغاربة كايحبو ملكهم و كايغنيو عليه و لكن راه ماشي بالاقحام ديال اسم الملك و تصوريتو بهاد الشكل فأي عمل فني غادي تبانو كاتبغيوه و ماشي بقوة الرايات و التونيات غادي يبان العمل ” ملحمي” و ” وطني” ، راه غادي تبانو كاتبغيوه اكثر لا درتو خدمتكم متقونة و هديتو للمغرب شي فيديو دايزو الكلام ! ياك نتوما ” مبدعين” وا عار تالله لاما بدعو ! واك واك بدعو نشوفو الابداع ديالكم.
شوف مثلا الاغنية ديال ديسباسيتو لي خلقات ضجة فالعالم كامل العام لي فات ! و غناوها الصغار و الكبار ! فالحفلات المدرسية تسمعها و فالطونوبيلات تسمعها و فالديور طالقينها ففرانسا و المغرب و ميريكان و اوغاندا … و ساهمات فالرفع من مداخيل السياحة فجزيرة بورتو ريكو بخمساوربعين فالميا !
هادي وي ! هادي ملحمة ! تستاحق تسمية ” ملحمة” ، ماشي اغنية بئيسة ماكاتفهمش ساسها من راسها واش على الملك ؟ و لا على كاس العالم و لا على شنو بالضبط؟
ولكن لي سالا معايا فديك ” المشحمة المگهمة” هوما الكلمات ! الكلمات لي سوا ديزو هاد الناس كايديرو بيهم الماركوتينغ للمغرب ! و لي خاص لي سمعهم من دخل المغرب و لا خارجه يحركو فيه شي حاجة ! و يخليوه يبغي يجي عندنا !
“بلاد الأمان و قداسة الاديان يزورها الانسان برعاية الرحمان”
غير هاد الجملة بوحدها خاصها مقال !
كيفاش بلاد الأمان ؟
و قداسة الاديان ؟
يزورها الانسان برعاية الرحمان؟
هوا المغرب بلاد ” الأمان” نسبيا وي بالمقارنة مع بعض العواصم الافريقية و لكن راحنا كانتنافسو مع ميريكان و كندا من ناحية الامان ماغاديش نقولو لكندا احنا احسن منك !
ثم آش هاد التناقض ؟ بلاد الأمان و يزورها الانسان فرعاية الرحمان ؟ ! واش دابا كاتقوليا المغرب بلاد الامان يعني مضمون عندك هاد الامان و لا كاتقوليا غير اجي راك ” فرعاية الرحمان؟” و ميريكان و كندا فرعاية شكون ؟
بلادنا حضارة ! سياحة و امان ! شهامة و كرامة و حقوق” الانسان ”
بلادنا حضارة وي ماقلناش ! و لكن راه تا المكسيك حضارة ! و ميريكان حضارة و نص ! و كندا حضارة ونص و تلت رباع !
! علاه حضارة الأزتك العظيمة فين كانت ؟ و شعب المايا فين كان؟ هادو ماشي حضارات تنتمي للقارة الامريكية ؟ و اليوم حيت حنا ولاد اليوم، كندا ماشي حضارة ؟ ميريكان يا ميريكان ماشي حضارة ؟ المكسيك ماشي حضارة ؟
كلمة ” حضارة” ماشي شي ميزة كايمتاز بيها المغرب على الدول المنافسة ليه ! اغلب هاد الدول عندهم حضارة ! و دازو عندهم حضارات ! بقات فواش ديك الحضارة زادو بيها القدام و لا بقاو حارنين و عايشين فالقرن جوج قبل الميلاد.
” شهامة و كرامة” ! فحال هاد الكلمات كايجيني لي كايكتبهم فعلا كايبغي غير يعمر بيهم باش يجيب اللحن هوا هاداك ! دابا واش غانجيو السلاموعاليكم ! السلاموعليكم آ العالم ! شنو عندكم آ سي المغرب كخصائص كاتخليك تكون احق بتنظيم كاس العالم ؟
عندنا ” الشهامة و الكرامة؟”
كيفاش الشهامة و الكرامة ؟ باش كاتقيس هاد الشهامة و الكرامة لي كاتدوي عليها ! آشمن وحدة قياس عالمية كاتستخدمها لقياس نسبة الشهامة لدى الشعب ؟ واش قستيها ؟ عندك شي اثبات عليها ؟ واش قستي الشهامة ديال الكنديين و لا المكسيكسيين و لا الميريكانيين و خرجتي باستنتاج انه نتوما المغاربة اكثر شعب ” شهم” فهادة كاملين ؟
واش كاتفلاو علينا بفحال هاد الكلمات ؟ مافراسكمش بلي الجيل لي كان كايسمع هادشي و كايأثر فيه مات و ولا فوسفاط صدرناه شحال هادي !؟
بلا مانهضر على ” حقوق الانسان” الكلمة لي تكررت بزاف فالاغنية ! وي كاين تقدم فحقوق الانسان فالمغرب بالمقارنة مع هادي واحد العشرين عام و لكن ماشي لدرجة نحطو ” حقوق الانسان” كآفونطاج و نغنيو عليه فالاغاني حيت اي حاجة تقدر تجيب ليك كاس العام للمغرب إلا ” حقوق الانسان” و راه الترتيب ديال المغرب فمجال حقوق الانسان يعطيكم الخبار. ثم من غير المعقول انك تغني على حقوق الانسان فدولة يا الله كاتحبو فهاد المجال بالمقارنة مع دول تجذرت فيهم هاد الثقافة لسنوات فحال ميريكان و كندا.
ماحشمتوش ؟
للاسف ! الناس لي وقفو على هاد العمل ماطبقوش ديك القضية ديال ” رحم الله عبدا عمل عملا فأتقنه” ! ماكاين غير كور و عطي للعور !
الوطنية ماشي هي تجمع عرام ديال المشاهير باش يغنيو اغنية بكلمات مبتذلة و تحاول تبلاصي فيها تصاور الملك فين ماوالاك زعما راحنا خدامين معاك آ سيدنا !
وا خدمو معاه بالابداع ! و لاماكاين ابداع تسوخرو اللور ! المغرب فيه افونطاجات و des atouts يقدر يغني عليهم الواحد من غير مايطيح فديك الصور النمطية الفولكلورية لي اغلب لي كايغنيو عليه كايطيحو فيها.