دويو علينا وجيو علينا. اللي قودها على المغرب ماشي غير كاينين شي وحدين ما مآمنينش بكورونا وعايشين حياتهم كيف السابق ولكن قرار كارثي دالعيد لكبير وبيان غبي للداخلية والصحة وتدبير كارثي للوزير ايت الطالب اللي ما مسوق حتى لشي مغربي

القتلى للي غاديين ويرتافع عددهم بسباب كورونا كل نهار والاصابات اللي ما بقاتش باغية تنزل على الف و200 فاليوم اكثر من سيمانا هادي٬ نتيجة لعوامل كثيرة. كاينين مواطنين ما مسوقينش. كيبوسو ويسلمو وعايشين حياتهم كيف كانت فالسابق. كاين فيهم اللي مدخل هاد الشي فالقضاء والقدر وتجي الموت او المرض ولا ما يجيش هاد الشي غير قضاء وقدر وكاين اللي مقتانع باللي هاد الشي مؤامرة "صهيونية" و"لا ديال الغرب الكافر" ولا ديال شركات الدوا.... هاد الفئات راهم كاينين فكاع الدول. مسيحية وبودية ومسلمة.. شفنا فاسبانيا هادي سيمانا خرجو للشارع كاع يحتجو. قبل هاد الشي كانو احتجو فبرلين ومدن المانية. شفنا بعضهم فامريكا فالهند فالبرازيل فالمكسيك....
لكن كاين مسؤوليات اخرى للحكومة فهاد الشي اللي وصلنا ليه.
دابا كاين قانون خاصو يطبق وما طبقش بحال تلبس لكمامة. فكاع دول العالم اللي ما طبقوش يخلص. ما خاصش يكون شي استثناء. القانون خاصو يطبق فالمطاعم وشفنا وحدين ردوها بوات فحي گوتيي فكازا بحال كيف دارت "بوكا كراني" وما هدر معاهم حد. شفنا قواهي دارو اللي بغاو وما هدر معاهم حد. شفنا ناس سافرو من بلايص ماشي مسموح بها يسافرو وما هدر معاهم حد شفنا كيران وطوبيسات وطاكسيات وترانات وميطروات عامرين مخالفين القانون وما هدر معاهم حد....
ثم هاد الشي اللي وصلناه راه نتيجة لتدبير الحكومة لقضية العيد لكبير. عارفين باللي اكبر حركة كتوقع فالمغرب كتكون فهاد العيد. كلشي كيشوف العائلة، عوض ما يلغيوه ولا يحبسو المدن قبل بالمرة٬ جاو ساعات قبل ودارت الداخلية والصحة بيان كارثي. النتيجة 16 واحد مات فكسايد والاف الناس نقلو العدوى والطرقان عامرة. الفيروس دار ما بغى.
هادي ماشي مسؤؤلية غير المواطن. هو مسؤول ولكن ماشي بوحدو. المسؤولية الاكبر لوزارتي الداخلية والصحة.
ثم نجيو لتدبير وزارة ايت الطالب لهاد الجايحة. كارثي بكل المقاييس. كيفاش وزير كيحتاقر لمغاربة. ما كيهدرش معاهم. دخل فحروب مع ناس الصحة. جرا على 6 مندوبي الصحة. ضارب مع اطر الوزارة.
علاش ما كيخرجش يهدر كاع مع لمغاربة او يحتارمهم ويرسل ليهم شي واحد كيجاوب على اسئلة ماشي كيعرض ارقام بحال شي ببغاء. هاد الوزير دار تدبير كارثي لتيست "بي سي ار" وشرا عدد قليل ودابا كاين نقص. دار صفقة فيها الهدرة بزاف ديال سيرولوجي اللي ما صالح لوالو من غير تيست كان يدار بعد ما خرجنا من الحجر وكنا نتجنبو هاد الشي اللي واقع اليوم.
كيفاش وصلات مراكش وصبيطارها المامونية لهاديك الحالة. وشكون خاصو يخلص ثمن هاديك الشوهة.
خاص كلشي يتحاسب. كلشي يخلص واللي دار شي حاجة تستحق الاشادة خاصو التشجيع