اللهم إن هذا منكر ها كورونا ها الزلزال ها الحرب بين حماس وإسرائيل ومع ذلك الحكومة قررات تزيد في ثمن الشراب وا فينك أدعيدعة أجي طل على المغاربة ولاو خاصهم يبيعو حوايجهم باش يشريو كرطونة دالبيرة بحال لي كيدييرو في العيد لكبير

اللهم إن هذا منكر، من بعد كورونا يالله كعدنا الراس شوية جا الزلزال تعاونا بيناتنا باش ندوزوه جات الحرب بين حماس وإسرائيل باقي حتى ماكملات هاهي الحكومة قررات تزيد في ثمن الشراب وفي نفس الوقت باقا كتدعم السكر لي هو سم قاتل كيستافدو منو غير صحاب الشركات الكبرى والعيادات الخاصة وكيتسبب في ثقل كبير على نظام الرعاية الصحية في المغرب، واش هاد الحكومة بغاتنا نحماقوا ونوليو نجريو عريانين في الزنقة فين غادين بهاد الديكتاتورية والحكرة الممنهجة لي كتمارس على السكايرية في المغرب كأنهم مجرمون مع وقف التنفيذ، وأي اعتداء على كرامتهم وقدرتهم الشرائية من طرف الدولة هو حق مشروع، وأن الدولة فوقاش ماتحتاج شي ريال تدور للسكايرية تضاعف الضريبة على الطاسة.
بحال إلى كاين غير الشراب في هاد البلاد هو لي كيستهلكوا المغاربة ليل ونهار باش دابا تزاد عليه الضريبة، علاش ماتزيدوها على الطحين والسكر والملحة والشيبس والفرماج والشكلاط وكاع المواد المضرة بالصحة علميا ولي كتجي من برا كتخلص بالعملة الصعبة، وكتسبب للمغاربة في انسداد الشرايين والسكتات القلبية والسمنة والجلطات الدماغية، زيدو الضريبة على الكيتشوب وماينويز وباقي الصلصات القاتلة والمضرة بالصحة، زيدو الضريبة على المعجنات بكل أنواعها وعلى الحلويات والبيسكويات وباقي الأنواع لي كتقتل المغاربة عرق بعرق والدولة كتفرج وكتحمل تبعات هاد النظام الغذائي الدخيل على ثقافتنا كمغاربة وكيستافدو منو غير الشركات الكبرى، بينمات الدولة كتحصل في مواطنين صحتهم على قد الحال مزاحمين في السبيطارات.
ضربة تابعة ضربة والله يحد لباس هادشي لي طرا لينا مع هاد الحكومة، فاش كانوا اللحايا قلنا هادو معندهمش مع النشاط هانية يزيدو الضريبة على الشراب راه متوقعة منهم وإلى داروها راه الفالطة ديالنا لي ماشركناش في الانتخابات وخلينا بحالهم يطلعوا، هاد المرة قلنا المومن لا يلذغ من الجحر مرتين مشينا نجريو نصوتوا على حزب حداثي مكرط فيه صحاب الفلوس وعزيز عليهم النشاط، صدقوا تاهوما بغاو يندمونا ديال بصح وغادي يديرو داكشي لي ماداروهش اللحايا حتى في عز أيام قوتهم، آش هادشي واقع فين غادا هاد البلاد خلاها رفيق بوبكر واش كاع هادشي لي واقع ومنشربوش الشراب أواه، وا فينك أدعيدعة أجي طل على المغاربة ولاو خاصهم يبيعو حوايجهم باش يشريو كرطونة دالبيرة بحال لي كيدييرو في العيد لكبير.