مزواري وبايرن ميونخ ربحو زياش وكلطة سراي في انتظار نتيجة أمرابط

ربح نصير مزراوي صاحبو حكيم زياش فالماتش اللي لعبو الدوليين المغربيين ضد بعضياتهم اليوم الثلاثاء، فالقمة بين بايرن ميونخ الألماني وكلطة سراي التركي فدوري أبطال أوروبا.
وسالا الماتش اللي تلعب فتركيا بين بايرن ميونخ وكلطة سراي لمصلحة الفريق الألماني بنتيجة 3 لواحد، وعرف الماتش مشاركة نصير مزراوي أساسي مع بايرن ميونخ ودخل حكيم زياش احتياط وما لعب حتى للشوط الثاني.
بايرن ميونخ بهاد الرباح رفع الرصيد ديالو إلى 9 نقاط، وكيتصدر الكروب 1، أما كلطة سراي وبعد هاد الخسران بقات عندو 4 النقاط، وكيحتل المركز الثاني فالكروب.
للإشارة فنفس الكروب فيه مانشستر يونايتد النكليزي اللي كيلعب معه النجم المغربي لاخر سفيان أمرابط، واللي عندهم ماتش هاد الليلة مع كوبنهاكن الدنماركي وخاصهم يربحو باش يحافظو على أمالهم فالتأهل حيث عندهم صفر نقطة فالمركز الأخير.