تفاصيل انطلاق معسكر المنتخب.. وصول حكيمي خالق الجدل.. ها موعد أول حصة تدريبية واجتماع للركراكي مع الأسود

غيبداو لاعبين المنتخب الوطني المغربي لكرة القدم التداريب ديالهم اليوم الثلاثاء فمركز محمد السادس لكرة القدم، وهذا الشي حيث غيدخلو معسكر إعدادي استعدادا لكاس إفريقيا فالكوت ديفوار، وراه بداو كيوصلو للمركز هاد الصباح ومازالين، فالوقت اللي خالق أشرف حكيمي الجدل بخصوص موعد الوصول ديالو وواش غيبقى حتى يلعب مع باريس سان جرمان ضد تولوز عاد غيجي.
وحسب المعلومات اللي توصل بها موقع "گود" من مصادر موثوقة، فاللاعبين ديال المنتخب الوطني المغربي مازال كيتوافدو على مركز محمد السادس لكرة القدم بالمعمورة، كاين اللي وصل هاد الصباح بحال الشيبي، الخنوس، سايس، عطية الله، وكاين اللي غيوصل هاد العشية وكاين اللي ما غيوصل حتى غدا الاربعاء، وهاد شي حسب التزامات اللاعبين والرحلات الجوية المتوفرة من البلدان اللي كيلعبو فيها، وغيكون اجتماع بين الناخب الوطني وليد الركاراكي واللاعبين تمهيدا لانطلاق معسكر الأسود.
وبالنسبة لأشرف حكيمي وموعد الوصول ديالو إلى معسكر المنتخب المغربي، فكاين تحفظ داخل الجامعة الملكية المغربية واش غيبقى مع باريس سان جرمان حتى يلعب ضد تولوز غدا الاربعاء السوبر الفرنسي كيفما ذكرت وسائل إعلام فرنسية بحال لوباريزيان، أو أنه غيجي يدخل بحالو لمعسكر الأسود بحالو بحال كاع اللاعبين.