وليد الركراكي: ها علاش ما عيطش على حكيم زياش.. راني كنوجد منتخب لكأس إفريقيا

أكد الناخب الوطني وليد الركراكي أن حتى لاعب من اللي عيط لهم لمواجهة كل من ليبريا وبوركينافاسو ما ضمن بلاصتو فالمنتخب الوطني المغربي، وأن حتى اللاعبين اللي ما عيطش لهم ما تقصاوش نهائيا من أنه يلبسو توني المنتخب ومن بينهم حكيم زياش اللي ما صيفطش له الدعوة.
وشرح الناخب الوطني وليد الركراكي خلال الندوة الصحافية اللي دار اليوم الخمس بمركز محمد السادس لكرة القدم، أسباب الاختيارات ديالو وقال: "هادي اختيارات المدرب دابا كنقلب على كروب اللي يمشي يدير كأس إفريقيا مزيانة يعني باش ندير أحسن اختيار فشهر دجنبر خاصني نشوف اللاعبين كاملين".
وكمل الركراكي وركز على زياش: "بحال سفيان بوفال موعت وحكيم زياش يالاه سنا مع كلطة سراي وباقي مادارش البريباراسيون يعني من الأحسن يوجد مع فريقو باش يرجع النيفو ديالو وعندو دوري أبطال أوروبا غيلعبو شهر 10، وإنشاء الله يكون معنا".
وشدد وليد الركراكي: "هذه فرصة باش نشوف لاعبين آخرين، بحال يونس عبد الحميد اللي ماكنتش كنتيق فيه ولكن دابا ملي كتشوف المدافعين ديال الوسط وهو اللي كيبقى فالنيفو ديالو خلاني نعيط له باش نشوفو، وهذا الشي ما كيعنيش أنه غيبقى ولا غيمشي ولكن ملي كنعيط كنقد نشوفو ونحكم عليه".