واخيرا تفاهمو..تيار ولد الرشيد وافق على "الصفقة" باش يدوز مؤتمر الاستقلال لي تعطل كثر من عامين: مناصب فالتعديل الحكومي وبقاء ميارة فالنقابة مقابل بقاء نزار بركة أمين عام باش يكون مرشح لرئاسة حكومة 2026

علمت "گود" من مصدر استقلالي بلي غايكون إجتماع حاسم بداية الأسبوع القادم لقياديين بحزب الاستقلال للحسم في مدخلات ومخرجات مؤتمر الحزب القادم.
وحسب مصدر "گود" الإجتماع كان غادي ينعاقد هاد الأسبوع لكن أغلب أعضاء اللجنة التنفيذية عندهوم التزامات ومهام خارج الوطن، بحال مضيان للي غادي لموريتانيا وغيرو.
مصدر قيادي كشف بللي الإجتماع المقبل (غالبا نهار الاثنين المقبل) غادي يرسم القرارات التالية: 1- الحسم فشخص نزار بركة أمين عام للحزب،
2- تحديد تاريخ للمؤتمر،
3- الحسم في أعضاء اللجنة التنفيذية للي غادي يفرزها المؤتمر بالتوافق، خاصة ما بين تيار الصحراء وتيار الشمال(تيار حمدي ولد الرشيد فقد كثير من القوة ديالو بعدما تخلى عليه عبد الصمد قيوح للي مقترح لمنصب حكومي في التعديل المقبل وأيضا بسبب الأخطاء القاتلة للنعمة ميارة للي يبدو أنو غادي يرجع للنقابة ويتخلى على رئاسة مجلس المستشارين فالتجديد النصفي فأكتوبر المقبل مقابل منصب حكومي لنجل حمدي ولد الرشيد)،
4- تدارس مستقبل التحالف الحكومي الحالي فأفق الانتخابات ديال 2026.
وأكد مصدر موثوق أن نزار بركة، الأمين العام، تلقى إشارات بللي عندو دور كبير فالمرحلة المقبلة وغادي يبدا فتفعيل الاستراتيجية للي تعطات لو.