صراع الأعيان فمؤتمر الاستقلال.. ولد الرشيد كيدعم المحامي الأنصاري لرئاسة اللجنة التحضيرية فمواجهة "الفلاح الكبير" قيوح للي باغي الاستوزار فالتعديل الحكومي

علمت "گود" من مصدر مطلع أن تيار حمدي ولد الرشيد، يدفع بالمحامي عبد الواحد الأنصاري، رئيس جمعية هيئات المحامين بالمغرب، للترشح لرئاسة اللجنة التحضيرية للمؤتمر المقبل لحزب الاستقلال.
وكشفت مصادر "گود" أن ولد الرشيد باغي يقطع الطريق على زعيم القطب السوسي عبد الصمد قيوح، من الأعيان اللي تقربو مؤخرا لنزار بركة الأمين العام الحالي، وذلك في خطوة أخرى باش يبين ولد الرشيد بلي باقي قوي فالتنظيم وهو لي غايحدد التشكيلة المقبلة للجنة التنفيدية.
اليوم كاين اجتماع اللجنة التنفيذية غايبدا مع الثالثة بعد الزوال، غاتكون فيه نقطة وحيدة للحسم هي رئاسة اللجنة التحضيرية.
وحسب مصادر "گود"، بعدما تحسمات بشكل شبه نهائي معركة مرشح الأمانة العامة الوحيد اللي هو نزار بركة، والانسحاب في صمت اللي كيشبه الهزيمة ديال المنافس ديالو النعمة ميارة، يبدو أن رئاسة المؤتمر ستؤول للمحامي عبد الواحد الأنصاري، وهو ولو كان كيحافظ على علاقات الود مع تيار حمدي ولد الرشيد ولكن راه محسوب على نزار بركة. الأنصاريون فحزب الاستقلال هوما هادوك: قلبهم مع حمدي وسيفهم مع نزار.
قيوح كيوجد وكيدير اتصالات باش يشد رئاسة اللجنة التحضيرية ويدوز المؤتمر مزيان ويتم ترشيحو لمنصب وزاري، ولكن ولد الرشيد واقف ليه فالطريق، بعبارة اخرى ميمكنش تاخد الاستوزار مجانا.
اليوم غادي تنعاقد اللجنة التنفيذية لحزب الاستقلال باش تعين رئيس المؤتمر المقبل وتشكل اللجنة التحضيرية للمؤتمر. بحيث الأخبار المتداولة من داخل أروقة الحزب كتقول باللي تيار نزار بركة غادي وكيقطع الأجنحة لتيار ولد الرشيد. هاد الأخير لحد الأن شاد لقنت وساكت وكيشوف الإمبراطورية ديال كتنهار، ولكن راه عارف أنها مجرد معارك أولية، وبللي الحرب باقا ما بدات وهي أتية لا ريب فيها ولن يخمدها سوى حصول ولدو محمد ولد الرشيد على منصب وزاري فالتعديل الحكومي المرتقب.