نهار الجمعة محسوب ظلما وعدوانا في المغرب على انه يوم عمل وهو في اقصى تقدير ربع نهار حتى لنص نهار ديال الخدمة ودابا داخل رمضان لي عبارة على شهر من يوم الجمعة مكرر

الدول الإسلامية في الشرق عندهم نهار الجمعة راحة ونهار الحد خدمة، والدول المسيحية والعلمانية في الغرب عندهم السبت والحد وراحة، والمغرب جاي في الوسط داير السيت والحد عطلة وزايد معاها حتى الجمعة ولكن غير بالريط وغير كعرف وصافي سنه الموظفون الكسالى الغشاشة بدريعة الذهاب الى الصلاة وبعدها ماكيدوزليش الكسكسو بلا جماعة العائلة ومشا نص النهار ديال الخدمة في القلاشي، بدعوى أداء فريضة دينية لا يتم الاكتفاء بكونها الصلاة فقط، بل تزاد ليها الكسكسو وغراف داللبن وطبعا لاسييست حيت مستحيل يقدر يخدم شي حد وهو معرگها كسكسو ولبن.
نهار الجمعة محسوب ظلما وعدوانا في المغرب على انه يوم عمل وهو في اقصى تقدير ربع نهار حتى لنص نهار ديال الخدمة، وجرب انك تمشي لأي إدارة تبغي تقضي شي حاجة غادي تلقى دغية النهار داز وكمل والموظفين مشاو للخدمة، اذن من الأفضل يولي نهار الجمعة يوم عطلة ونهار الحد يوم عمل مادام ان الجمعة أصلا راه شبه عطلة حاليا، وبالخصوص دابا جاي رمضان لي تقريبا هو عبارة على شهر من أيام الجمعة تتكرر يوميا، بلا إنتاجية وبعصبية زايدة وبلا أي مظهر من مظاهر الايمان، كتشوف غير بنادم حمق كاعي زربان جيعان مقطوع مكيحس لا بفقراء لا بأغنياء كيحس فقط بالمدمنين في مراكز علاج الإدمان.
مايمكنش يبقى نهار ناقص من السيمانة الإنتاجية للاقتصاد المغربي ومع ذلك نبغيو نافسو ونواكبو ونخدمو المواطن، بالاظافة الى كثرة الأعياد والمناسبات والتسهويك، بلاد بلا موارد طبيعية وفيها تقويبا تلات أيام عطلة في السيمانة راه غير منطقية هذا راه ترف ديال الدول الاسكندنافية ماشي الافريقية، المغرب راه خاص يخدم الجمعة والسبت والحد وشوف تشوف.