بالفيديو: ابيضار كدخل وتخرج فالهدرة. كلام كالتو معقول وكلام غير كتخور وصافي: اييه كنشرب الشراب وكناكل الحلوف ولمغاربة هما اللولين فالبورنو والثانيين فالشراب

لبنى ابيضار باغية تولي نجمة وصافي. السيدة تالفة وحواراتها الاخيرة كتبين باللي ولات ضحية لشهرتها. فمهرجان خيخون باسبانيا تكلمات كلام معقول كيهمها كشخص وكانسان وهي حرة فيه وقالت انها كتشرب الشراب وكتاكل الحلوف. امر عادي عند الاسبان والاوربيين ولكن هي كانت كتقصد بيه لمغاربة. حقك يا لالة ديري اللي بغيتي
فين هي خوراتها ودخلات وخرجات فالهدرة هي باش ولات منظرة. كتكلم على الاسلام وعلى المغرب. كالت يا سيدي ان المغرب اول مستهلك لافلام بورنو. منين جابتها الله اعلم. طبعا هادا كلام لقهاوي وهو ماشي صحيح. لو ان المغرب اول مستهلك كون عندنا صناعة كبيرة ديال بورنو وهي منعدمة. النقطة الثانية اللي خاوية كالت المغرب ثاني مستهلك فالشراب. طبعا غير هدرة خاوية ديال لقهاوي يمشي اي واحد لكوكل ويزور المواقع المتخصصة اللي عندها مصداقية غادي يعرف باللي كلامها ماشي صحيح. لالة لبني راهم كيضحكو عليك فاسبانيا.
لالة ابيضار عنداك تحولي لكلون عند الغرب كلشي كيضحك عليه. من حقك دافعي لى راسك على فيلمك على اختياراتك على كلشي ولكن بغيتي تفهمي كثر غادية ضحكي عليك الناس