مذكرات مدلكة سانك ايطوال الحلقة 10: فحال الكورة فيها بروميار و دوزيام ديفيزيو و قسم الهواة حتى التق*** فيه البنات لي كايلعبو فالطروازيام ديفيزيو و لخرين لي كايلعبو فدوريات وطنية و قارية و دولية كاع ! ماشي كلشي كايخرج للزنقة حيت فيه الجوع.‎

أول كليان ديال الماساج لي غانعس معاه كان هو عصام! من بعد غانعرف علاش بزاف ديال الرجال كايتعاطاو للماساج و كايبغيو ي*ويو بهاد الطريقة، كاين فيهم لي لاباس عليه كايخسر الزبابل ديال الفلوس و كاين لي كاتلقاه خدام خدمة عادية و كايمشي ليه نص الصالير فالماساج … علاش الماساج ؟ علاش ماكايمشيوش عند القحاب ديريكتومو ؟
واحد، حيت العنصر ديال لاديسكريسيو مضمون ( الدق و السكات) تمشي لصالون ديال الماساج ماشي هي تمشي للدار عند قحبة و تصدق مخرجينك البوليس ملوي فيزار بيض كي اللفتة حيت الجيران تشكاو و لا تجيبها عندك للدار و تدخل عليك المرا، فالصالون كاتكون هاني و حتى لاسولاتك المدام فين كنتي؟كاتجاوبها مشيت نحسن. وجوج حيت الجو ديال المساج مختلف… الضواو، الروايح، الموسيقى، الماساج براسو لي كايسبق النعاس … هادشي كلو كايخلي لي كايتبلا بالماساج يولي مدمن على النعاس بديك الطريقة!
أول كليان ديال الماساج كان هو عصام، و كانت تجربة عادية جدا! لا ماحسيتش براسي موسخة من بعد ! لا مابكيتش و ماتعداش عليا! لا ماتخلعتش منو و بقيت كانقفقف! ديك الصورة ديال الضحية لي كاع القحاب كايبغيو يصوروها هي واحد الصورة كايرتاحو فيها و صافي باش مايعتارفوش بلي راه هوما لي ختارو ي*حبو ! حتى القحاب اللاسيانات لي زعما كانشوفهم بروفيسيونيل فاش كايسكرو مع الجوج د الليل شحال من وحدة فيهم كاتصدمني ،كاتبقا تحسر عليك و تخنن و تصور راسها على انها ضحية للمجتمع و الفقر و لباها لي ماعندوش باش يقريها و لصاحبها لي سمح فيها المرا الأولى … و كايقلبوها دراما مصرية من انتاج السبكي. طبعا كاينين القحاب طروازيام ديفيزيو لي كايلعبو فالتورنوا ديال مالين البيكوبات و الخضارة و صحاب البال لي كايقحبو باش يتعشاو و لا كايقحبو باش يضبرو فشي الف ريال باش يعمرو البوطة و باش يصرفو… و لكن ماشي كلشي كايلعب فالتورنوا ديال مالين البال. كاينين بزاف كايلعبو فدوريات وطنية و قارية و دولية كاع … و هادو ماكايقحبوش حيت ضحايا ديال شي لعبة ! كايقحبو عن اختيار، باش مايركبوش فالطوبيس باش يديرو تاهوما كيا بيكانطو ! و باش مايلبسوش المدرح باش تاهوما يلبسو المايكل كورس، و باش مايهزوش الساك شينوا و تاهوما يهزو الساك لوي فيطون. و هادو كاينين و كاين منهم بزاف…و لكن كايعتابرو راسهم ضحايا حيت لا كنتي عايشة فمجتمع كايعتابر القحاب اوسخ خلق الله احسن ليك تيقي بلي انك تفرض عليك تكوني قحبة على انك تعتارفي بلي ختاريتيها.
أنا من الأول كنت عارفة شنو كاندير و شنو باغا ! و ماعمري شفت راسي ضحية ديال شي حد! أنا لي ختاريت و لي ختار شي حاجة خاصة يقد بيها.
عصام كان ضريف معايا، صدق مختالف بزاف على التلفزة، و شحال غريبة تنعسي مع شي حد كنتي كاتشوفيه من بعيد !البنات معايا فالصالون كايتمناو يشوفوه عن قرب و يعرفوه كيفاش عايش و شنو كاياكل و شكون صاحبتو ؟ أنا هداك عصام شفتو و هو عريان و هو عرقان و هو معصب، شفت الخالات لي عندو تحت كتفو و شفت عينيه كايتقلبو فاش كايجيبو … و عكس الصورة لي كاتبان عليه فالتلفزة ديال الراجل الفحل، الدون جوان قاهر قلوب العذارى، السيد صدق دريويش فال*وا و حشومي شوية، خاص لي يوريه و يكيدو و يعاونو باش يبلاصي … الوجه لي كايبينوه الرجال للقحاب مختلف تماما على الوجه باش كايلقاو صحاباتهم و عيالاتهم و الناس الخرين … لابغيتي تعرف الراجل كي داير بصح و شنو كايبغي و شنو ماكايبغيش ماتسولش مرتو… سول قحبتو و لا صاحبتو لاكانت قويفزة.
-"عفريتة نتي" قالها ليا و هو كايطلع سروالو
ماجاوبتوش، مشيت حداه و عنقتو حيت كان مدرق عليا الماليطة، الشوفة فالفلوس كاتريحني …
-"غاناخد نمرتك من عند سميرة ! ضروري نعاودو نتشاوفو"
-عاونتو يسد صدايف القاميجة " عيط ليا فوقما بغيتي"
القضية فيها ثلتالاف درهم فساعة د الخدمة ! جوج صاليرات ديال "عبد الرحيم" السيكيريتي لي عندنا فالعمارة ديال الصالون، نص التمن ديال الآيفون اللخر لي كنت عوالة نجمع ليه فلوسو، تسافيرة مبرعة لمراكش … هادشي كلو كنت كانشوفو فثلتالاف درهم و فاش ؟ فساعة ديال الخدمة! راه نقدر نعقد ليه السيورا ديال السباط ديالو و لكن كان لابس سبرديلة داك النهار.
عصام هبط و خلاني كانلبس حوايجي، جمعت الزيوت لي كانو محطوطين، قاديت الماليطة ديالي، عاودت كحلت عيني و قاديت شعري قدام المرايا،شعلت التيليفون، و طبعا تسرسبو عليا طون ديال الميساجات فواتساب من عند كريم، "فينك؟" " علاش ماكاتجاوبيش؟" "فاش تسالي عيطي ليا" حتى نخرج و نعيط ليه، حطيت التيليفون و بديت كانقاد الفراش كيما كان حتى سمعت صوت سميرة.
-"غير خلي داكشي، دابا تطلع عيشة تقادو"
– شفت فيها، يالاه غانجاوبها و هي تقطعني…
-"ماعندي مايتسالك آ ندى صدقتي قويفزة ! كنت عارفاك ماغاديش تحشميني كايعجبوني البنات القافزات، حيت كايفكروني براسي…حتى أنا كنت فحالك واحد النهار ( عادة ماكانحملش نسمع هاد فحالك من عند شي حد حيت تاواحد مافحالي و لكن من عند سميرة كنت باغا نعرف الكمالة ديال الهضرة ).
-"عاجباك الخدمة فالصالون ؟ "
– شوية – جاوبتها وانا كانشوف فتيليفوني، كريم كايعيط الضو كايشعل، مايمكنش نجاوبو قدام سميرة.
قربات حدايا اكثر،،جرات الكرسي ديال الكوافوز و جلسات ،كانشوف فيها حتى جبدات كارو و شعلاتو
-"ماكايناش شي حاجة سميتها شوية فالحياة، كاين عاجباك و باغا تبقاي و ماعاجباكش و باغا تبدلي"
-"ماعاجبانيش و باغا نبدل"
شافت فيا و سكتات، واش كاتسايني نكمل هضرتي؟ ضربات الكارو بصبعها باش طيح الطفية، فديك اللحظة تخايلت راسي أنا هي ديك الطفية، شافت فيا.
-"تبغي تخدمي معايا؟"
نخدم معاها ؟ فين غانخدم معاها و علاش و كيفاش؟ باغا تقودني و لا شنو؟ هي اصلا فين خدامة؟ ماعمري مافكرت فهاد السؤال، كانت كاتجيني فحالا خدامة فشي شركة و لا شي بنكة حيت ديما كاتجي لابسة كلاس للصالون و كاتهضر بزاف بالفرونسي فالتيليفون …
-"فاش غانخدم معاك ؟ "
-"فخدمة لي غادخل ليك داكشي لي كاتخلصي فالصالون فشهر كامل ! فليلة وحدة"
فنفس اللحظة طلع ليا ميساج من عند كريم "علاش ماكاتجاوبيش؟ شنو واقع؟ هانا جاي لعند ديك الكليانة"
(يتبع)