صور جنازة العتابي: عندما يبكي الرجال في الريف فاعلم ان القضية حامضة بزاف

مشاهد مؤثرة بزاف لشباب الريف البارح وهما كيبكيو. كيبكيو فجنازة الشهيد عماد العتابي اللي تدفن فمقبرة أيار أزكاغ بالحسيمة. شباب واطفال كيبكيو على رحيل هاد الشاب. البكاء اخد شكلا جديدا. شكلا نضاليا في الريف الجريح. الحراك انطلق سلميا وانتهى جنائزيا. بدا بالرغبة في تغيير واقع وانتهى بالرغبة في عودة الشباب والاطفال الى بيوتهم سالمين. شي مشدود فالحبس شي كيواجه الموت بشجاعة كيف دار ربيع الابلق اللي وقف الاضراب وشي انهار قدام الموت وما قاومهاش بحال العتابي.
بكاء هاد الشباب عندو نتائج ديالو. كيف جا ف"كود" سابقا. الريف دخل مرحلة دائرية. كل مرحلة كيتعقد الحل اكثر. خاص حل اخر مشكلة والمشاكل اللي بقات عالقة قبل. هنا كتتراكم المشاكل.
سقوط قتيل انضاف الى القتيل الاول اللي كان الشرارة فهاد الشي كلو محسن فكري٬ ما غاديش يسهل الامور. كانت مؤشرات انفراج بدات تبان بعد اطلاق المجموعة الاولى من معتقلي الحراك. دابا الكورة عند الدولة. خاصها تزرب بحلول فالحقيقة بحل واحد هو اطلاق الدفعة الثانية فالثالثة الى ان يعود جميع الشباب الى ذويهم.
البكاء ديال البارح احتجاج بكاء الحركة وبكاء الفقصة وبكاء على وطن قاس على ابنائه. ردو بالكم من الانسان ايلى بكا.