حزب الاستقلال مازال عائق باش بنكيران يعلن على تشكيل حكومتو. هجوم "العلم" على اخنوش قضى على كل امل لوجود الاحرار مع الاستقلال تحت خيمة الحكومة وتحفظات مرفحين كازا على شباط زاد عقد كلشي

التقى عبد الاله بنكيران رئيس الحكومة المعين يوم امس السبت في مقبرة الشهداء بعزيز اخنوش رئيس التجمع الوطني للاحرار. اخنوش حضر لكنازة واحد ما عائلة حزبه اللي هو فنفس الوقت ولد خو بنكيران. البارح وكيف ديما تسالمو وتبادلو العزا شي فعائلتو السياسية وشي فعائلتو تو كور. طبعا فهاد الظروف لا بنكيران لا اخنوش ممكن يهدرو على شي حاجة من غير ما تقتضيه الظروف. شي يعزي شي.
العلاقة بين بنكيران واخنوش واخا كلشي اللي وقع فالاخير مزيانة. عندهم احترام كبير بيناتهم. بنكيران كيعز اخنوش بزاف عارفو وجربو واخا وقعات بعض السحب اللي حاولت تعكر صفاء هاد العلاقة بحال قضية صندوق التنمية الفلاحية. اخنوش حتى هو كيعز بنكيران واخا وقع اللي قلنا وشي حمل المسؤولية للاخر. دابا الظروف تغيرات. اخنوش ولى رئيس حزب بحال بنكيران وهاد الاخير عندو مسؤولية تشكيل الحكومة. غير العائق الكبير بيناتهم دابا هو حزب الاستقلال.
اخنوش ما باغيش يدخل لحكومة فيها الاستقلاليين. تبريرو كما قيل في وقت سابق هو ان حكومة بحال هادي مألها الفشل حقاش ما يمكنش لشي عاقل يثيق فحميد شباط الامين العام. اي ان الاحرار عندو مشكلة ماشي مع الحزب ولكن مع الزعيم الحالي ديالو. بنكيران كيكول باللي عطيت الكلمة ليهم وغادين يدخلو لحكومتي. وقال ان شباط احبط انقلابا علي العدالة والتنمية كان غادي يوقع ليلة السبت 8 نونبر. اي يوم بعد الانتخابات التشريعية ويومين قبل تعيين الملك بنيكران الاثنين عاشر نونبر بالدار البيضاء.
كانت الامور تقدر تقاد وفق مصادر "كود" كون ما خرجش الاستقلال للعار وشبع سبان فاخنوش فجريدة "العلم". هاد الشي قضى على كل تقارب فشي حكومة. اللي زاد عقد المسائل وفق مصادر "كود" ان الاستقلال جبد الهمة مستشار الملك وباللي ماشي غير شباط اللي كيشكل فيطو بل حمدي ولد الرشيد الرجل القوي في الصحراء. تيار في الدولة كان دائما يرفض هيمنته على الصحراء ويذهب الى ان دخوله للحكومة سيفرض شروطه باعتباره واحد من الثلاثة اللي كيفاوضو بنكيران =شباط والسوسي وحمدي ولد الرشيد=. مصادر ل"كود" قالت ان التحفظ على هيمنة حمدي ولد الرشيد على حزب الاستقلال اكثر بكثير من التحفظ على حميد شباط.
ينضاف الى ذلك كون رجال اعمال كازاويين ابدوا امتعاضهم من دخول الاستقلال. فالحقيقة خايفين من شخصيات بحال عادل الدويري يدخل للحكومة. هاد رجال الاعمال اللي كيساندو الاحرار ما باغينوش يدخل فحكومة مع الاستقلال.
هاد الشي كلو كيصعب تشكيل هاد الحكومة. بنكيران خاصو يحسم. ايلى بغى الاحرار خاصو يصبر اي يقبل دعم الاستقلال بلا ما يدخلو بشكل مباشر للحكومة. قيادي استقلالي كان اقترح في تصريح سابق ل"كود" على قيادة الاستقلال "دعم حكومة بنكيران بلا ما يدخل ليها مباشرة" اي يدخلو استقلاليين مستقلين ويمكن ياخدو كاع رئاسة مجلس النواب. حزب الاستقلال كان قال باللي هو مع حكومة بنكيران بدون شرط او قيد. يعني انهم قادرين يقبلو هاد الشي.
حقاش المغرب وعارفينو. التجمع الوطني للاحرار باغييه بنكيران قبل من اللي فوق بنكيران. بنكيران واعي بزاف باللي هاد الحزب غادي يربح منو بزاف وصداعو قليل. دابا الكورة عند بنكيران اما لقاء اخر مع اخنوش في ظل كل واحد على موقفه ما غاديش يوصل لشي حل