البرنوصي اللي كالت ليهم خاص تعيين اخنوش رئيسا للحكومة باغية تخرج على لبلاد وتقضي على هاد شوية الديموقراطية اللي عندنا وتفتح المواجهة بين القصر والشارع مباشرة

نادية البرنوصي اللي كانت فاللجنة اللي صاغت دستور 2011 وخبيرة دستورية كتفكر بالخشيبات بالحساب. مقترحها اللي كالتو لمجلة "تيل كيل" كمخرج من البلوكاج الحالي كارثي بكل المواصفات. السيدة اللي هي خبيرة دستورية قالت للمجلة السيناريو الاقل كلفة للمغرب هو تعيين عزيز اخنوش رئيسا للحكومة. يعني ان سيناريو انتخابات سابقة لاوانها او تعيين شخصية اخرى من الحزب الثاني ما كاينش.
الكارثة فهاد التفسير المتخلف للدستور انه اولا غير ديموقراطي. التجمع الوطني للاحرار ما جاش لا الاول لا الثاني لا الثالث فالانتخابات بل حل رابعا. ثانيا باش دارت الانتخابات وتم اعلان النتائج ما كانش اخنوش رئيسا للاحرار كان صلاح الدين مزوار. من غير هاد الشي تعيين اخنوش رئيسا للحكومة ماشي غير غادين ندخلو فازمة سياسية اللي غادية تكون عندها عواقب فالشارع بل غادين يقضيو على الجناح المعتدل فالعدالة والتنمية. غادي يولي خطاب العدل والاحسان اللي عندو قوة كبيرة مقنع لفئات امنت بالديموقراطية.
بالاضافة الى هاد الشي الاخطر في ما قالته خبيرة دستورية ساهمت في صياغة الدستور الحالي هو ان اقتراحها سيجعل لاول مرة في عهد الملك محمد السادس مواجهة مباشرة بين الشارع والملك.
هاد البرنوصي ما تبعاتش اخر الاحتجاجات على مول الحوت اللي تطحن فكاميو الزبل بالحسيمة ما لاحظاتش الشعارات كيفاش بدات كتغير ما سمعاتش باللي راه ما بقاش المخزن بوحدو اللي كيتجبد فالشعارات.
هاد المواجهة كارثية. حقاش اكيد العدالة والتنمية واخا يقبل بهاد السيناريو غادي يمشي للمعارضة وما غاديش يبقى اللي كيواجه هاد الشارع من غير الملك من غير القصر.
البرنوصي فما قدمته غادي يخرج على لبلاد ويقضي على شوية الديموقراطية اللي مضاربين معاها وكنتعلموها كلها. بالصراحة كيبان فهاد البلاد الملك اكثر ديموقراطية ماشي غير من شعبو حتى من نخبو. الوحيد اللي طبق الدستور وفجانبو المشرق عندما عين رئيسا للحكومة ماشي غير من الحزب الاول بل امين عام هاد الحزب.