فضيحة كبيرة وشوهة عالمية لامزازي وزير التربية والتعليم من غير "ركوع الاستوزار" اللي حقق قياسي غير مسبوق فالانحناء: قرا ولادو فالمدرسة الفرنسية وكان نشيط بزاف بزاف فجمعيات اولياء تلاميذ ديكارت وشوفو اش دار

سعيد امزازي اللي عينو الملك محمد السادس هادي يومين فمنصب وزير التربية الوطنية بعد ما كان رئيس جامعة محمد الخامس بالرباط صنع الحدث. صنعو يوم التعيين ب"ركعبة الاستوزار" اللي بقى ليه غير يقيس الارض. قدام الملك وربما لاول مرة في المغرب كيركع كثر من هاد الشخص اللي كيرافقو وكيرافق اي شخص اثناء التعيين الملكي او انشطة مماثلة. السيد شدو فيه مزيان وشي وحدين ربطو بين هاد الانبطاح لكبير اللي اعتقدنا انو ما بقاش وبين اللي كيتسنانا مع هاد الجامعي اللي هو ولد الداخلية واجهزتها من بوه لعمو .
لكن لفضيحة لكبيرة ماشي هادي بل ما اشارت اليه "لوديسك" بناء على تويتات تنشرات البارح. كتقصد مقال نشر ف2012 وهاديك الساعة السي سعيد امزازي كان كيقري ولدو لليسي"ديكارت" فالرباط. وكان من غير هاد الشي احد وجوه جمعية اباء واولوياء تلاميذ هاد المدرسة اللي تابعة للبعثة الفرنسية.
السي سعيد امزازي دار وقفة كاع باش يحتج على رفع الثمن حينها ب40 بالمائة. فهاديك الساعة كان العام كيطلع ب43 الف درهم =ربعة المليون وستين الف ريال= لكل تلميذ فهاد المدرسة. والسيد دار تصريح وخرج ف"لوفيگارو" كاع وشوفو الرابط.
السيد شكلا ومضمونا ما مسوقش للتعليم فالمغرب. يقري ولادو فمدارس اجنية ويجي يقول ليك غادي ندافع على المدرسة الوطنية. وكون هاداك النضال اللي درتيه فمدرسة البعثات الفرنسية درتيه فالتعليم العمومي ومعاك ناس كثار كون حالنا اليوم ماشي هو اللي كنعيشوه فالتعليم. الله ينعل اللي ما يحشم. كاليك وزير التربية والتعليم. تصورو بحالو فشي دولة قريبة لينا فالديموقراطية واش غادي ياخد هاد المنصب