سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
ها علاش بنكيران ما حضرش لمذكرات اليوسفي. وصلاتو دعوة من مجهول وداوها فالاجانب ونساوه هو والفاسي والعراقي والعمراني وعرض على ازولاي اللي كان شرشم حكومتو
غريب ان وزير اول سابق دار مذكرات بحال عبد الرحمان اليوسفي “احاديث في ما جرى” وعرض على ناس على برا وما عرضش على وزراء اولين سابقين بحال احمد العراقي والعمراني وعباس الفاسي ثم رئيس الحكومة السابق عبد الاله بنكيران. في المقابل جاب ناس من برا بحال الاخضر الابراهيمي وفيليبي گونزاليس…. حضر فهاد الحفل اللي دار هاد السيمانا فمسرح محمد الخامس مستشار الملك السابق والحالي اندري ازولاي. كلشي كيعقل اش دار هاد المستشار لحكومة اليوسفي ف”لوموند”. دمرها وسالى معاها. كيفاش بحال هادا حاضر وزملاء وصحابو فالسياسة ما عرضش عليهم. كاين شي حاجة ماشي هي هاديك. شكون دار هاد الشي وشكون تكلف بيه. بالنسبة لحالة عبد الاله بنكيران٬ فقد علمت “كود” انه توصل بدعوة للحضور من شي حد “حتى اللي جاب الدعوة ما عرفو حد. حطها وزاد” يشرح مصدر مقرب منه ل”كود”. من بعد شي حد اخر جاب ليه دعوة ولكن ديما عادية. اي انه ما تلقى حتي بشي اتصال او مكالمة وفق ما اكده مصدر “كود”. اواه غير فالعرس كيرسلو الناس انفيتاسيون وكيتبعو داك الشي بالتلفون مع الشخصيات. كيفاش هاد الناس تعاملو بهاد الطريقة المذلة مع شخصيات بحال بنكيران. كيفاش نظمو كلشي لشخصيات خارج المغرب وما داروهاش مع لمغاربة. طبعا بحال هاد الدعوات المجهولة هي اللي خلات بنكيران ما يحضرش. كون حضر كانت غادية تكون مشكلة. حقاش لبلايص محسوبين والصفوفة معروف شكون غادي يجلس فيهم. دار مزيان باش ما حضرش
