سكوب. يوميات ابيدجان: كيفاش المغرب غادي يجمع اكثر من 6 الاف تذكرة واخا الجامعة الايفوارية ما عطاتوش اكثر من 400: التصاحيب والعلاقات الديبلوماسية والانسانية لعبات وها للي لعبو دور كبير فهاد الشي

البارح فوزي لقجع رئيس الجامعة الملكية لكرة القدم في تصريح للصحافة بخصوص ضمان تذاكر الجمهور المغربي اللي غادي يحضر غدا لماتش الكوت ديفوار ضد المغرب بملعب هوفويت بوانيي قال كلشي بلا ما يقول كلشي. قال باللي الجامعة الايفوارية خصصت للمغرب 400 تذكرة. ما انتقدهم ما قال عليهم والو. وكيفاش جاية غير مع الخطوط الملكية المغربية شي 3500 مغربي منين غاديين يجيوهم هاد العدد؟ لقجع تحدث فقط على صداقتو برئيس الجامع وشكرو بزاف وتحدث عن العلاقات القوية من القمة على البقية الشعب. واثار دور السلطات ومغاربة الكوت ديفوار.
ايلى تبعنا كلامو. 3500 مضمونة حقاش غير السبت غادية تجي 18 رحلة من مدن مغربية الى ابيدجان٬ ينضاف اليها الجامعة المغربية هنا فالكوت ديفوار واللي عددها شي 5 الاف بلا ما ننساو مغاربة بدول افريقية باغيين يجيو يتفرجو وحتى مغاربة من اوربا. طبعا ماشي 5 الاف مغربي هنا كلهم غاديين يدخلو ولكن عدد منهم. الور كيفاش هاد الشي.
لقجع شكر الجمعيات المغربية. كنعرفو غالبية الجمعيات هنا كيفاش دايرة وشكون متحكم فيها. ما علينا. المغرب وفق مصادر "كود" تلقى الضوء الاخضر طبعا من هنا. حقاش كانت اجتماعات مكثفة فالموضوع واللي لعب دور كبير فهاد العملية هو سفير المغرب هنا فابيدجان. علاقاتو تحركاتو واخا مقلقة شي بعضين وضدو شي وحدين مغاربة شي اطراف٬ ولكن هاد الخدمة عطات نتيجة، بناء على هاد التحركات كان اول بيان للخطوط الملكية المغربية عن رحلات من كازا ومراكش وطنجة يحكي مصدر من الرباط ل"كود".
بهاد الطريقة مشاو لمغاربة المقيمين هنا وشراو تذاكر. تفتحات الطريق. مع التيران ما فيهش ارقام لكراسى واللي جا يجلس ماشي مشكل ديال التوزيع. العدد اللي ممكن يكون من المغاربة وفق التوقعات يقدر يوصل ل6 الاف. ثمن التذكرة اللي شوية غالي علي الناس هنا كان عندو دور كذلك باش تمشي حصة منو للمغرب.