ابن عرفة حالف حتى يقتل السياسة. بارد باسل ضعيف بلا شخصية كيقول كلام هو راسو ما مصدقوش. كاليك الاحرار ما قاطعوش المجلس الحكومي. هاد الشي ما كاينش واتحاد لشكر الضعيف لمشوه كيسبهم كل نهار وهو حال فمو ويضحك

ابن عرفة السياسة بالمغرب اللي خدا رئاسة الحكومة بلا استحقاق غادي ويقتل السياسة. كيقتل فيها بزاف بزاف. اللي قرا حوارو الاخير مع “هسبريس” هاد الشي اللي غادي يخرج بيه. امين عام البي جي دي مهزوز ضعيف بسل السياسة. حالف حتى يقضي على السياسة حتى يزيد يدل هاد الممارسة ويحيد ليها كل معنى.
فحوارو اللي ما جاوب فيه على حتى شي سؤال وبقى كيدخل ويخرج فالهدرة٬ قال باللي هو رئيس الحكومة. طبعا هاد الشي كلشي عارف باللي ما فاهم والو اولهم بعض وزرائه. عارفينو ضعيف ففهم الملفات وضعيف فشخصيتو وباللي ما رئيس الحكومة ما تا وزة. غير فالواجهة وصافي. قال ليك باللي كيستحضر مصلحة الوطن. فتاريخ السياسة عندنا اللي كيقول هاد الهدرة كيعني اولا واخيرا ديرو بي ما بغيتو وما فيديش وما نقدرش نواجه. الوطن محتاج لرجال عندهم القدرة يقولو اللا ويضاربو ويتعافرو ويقولو لهادوك اللي تقولبو وصوتو على حزبك وما كنتيش فيه انت : ها اللي واقع ها كيفاش كنعيشو ها المشاكل.
الغريب فهاد الحوار بان باغي يقتل الحوار وحرية التعبير حتى فحزبو عندما قال “من المفروض في أعضاء الحزب الالتزام بمواقفه الرسمية، والدفاع عنها لا التشويش عليها” واضاف “لما يصدر أحيانا من تصريحات أو تدوينات لا تلتزم بذلك”. نسى باللي حلفاؤو خاصة الاتحاد الاشتراكي كيسبوه يوميا كيسبو ناس حزبو وهو حال فمو ويضحك هيهيههي
من اجوبتو المضحكة المبكية انو قال ان الاغلبية متماسكة. على من كتضحك. على راسك ممكن من غيرو حتى حد ما مصدق هاد التخربيق اللي كيتقولو. كيفاش الاغلبية متماسكة. قرا بيان التقدم والاشتراكية وصحيفة الاتحاد الاشتراكي. الصحافة اللي خرجات لخبار يا السي لفهايمي جابتو من مصادرو. اييه الاحرار ما حضروش للمجلس الحكومي احتجاجا على تصريحات بنكيران فمؤتمر شبيبة الحزب وانت عارف هاد الشي ومتاكد منو ولكن كيتخرج فحوار كتقول “أني لم أبلغ في أي لحظة بأي نوع من المقاطعة، وأن الأمين العام للحزب اعتذر قبل الزيارة لبرنامج خاص مبرمج سلفا في مدينة العيون، وأكد بعد ذلك أن تلك الإشاعة غير صحيحة”. واش بعقلك بصاح واش بصاح انت دكتور بصاح وكدير علم النفس وبصاح رئيس حكومة؟ فين عمر شي حزب غادي يجي ويقول ليك راه مقاطع المجلس الحكومي. راهم دارو معاك السياسة يا هادا. حضرات لمياء بوطالب كاتبة الدولة في السياحة باش ما تحسبش عليهم المقاطعة وغابو كلشي وكانو فالمغرب ولا قراب وممكن جدا جدا الحضور للمجلس الحكومي. كيفاش بغيتي تقولب هاد الحزب ويدير بيان يقول باللي كيقاطع. هاداك الرد ديالك فحوارك مع “هسبريس” غريب بلا ما نقول شي كلمة اخرى مقودة ” أولا، وثانيا لا يتصور أن يقاطع أي وزير دون مبرر معقول المجلس الحكومي أو أي مؤسسة دستورية أخرى، لما يمثله هذا من إخلال واضح بالمسؤولية الحكومية. وقد حضر جميع الوزراء في اجتماع المجلس الحكومي الأخير (15 فبراير 2018)”.
حتى باش بغيتي تهدر على بنكيران وتحشي ليه الهدرة ما قدرتيش ودرتيها بطريقة غريبة مرة اخرى “المفروض في أعضاء الحزب الالتزام بمواقفه الرسمية والدفاع عنها، لا التشويش عليها. مع الأسف تصدر أحيانا تصريحات أو تدوينات لا تلتزم بذلك، وأضيف أنه إذا كان النقد والاختلاف في الرأي أمرا مقبولا، فإن الإساءة إلى الأشخاص وتجريحهم غير مقبولين وينافيان منهج تعامل الحزب مع الآخرين”. ما فهمتيش التصريح وما فهمتيش ابعادو وما قدرتيش حتى تجبد اسم مول التصريح. الله الله على الشجاعة على اللي باغي يخلي لمغاربة ينخاطرو فالسياسة. هاد السيد كيقتل فيها. فالعالم كولو السياسة حرب “بالهدرة”. شوفو اي دولة فالعالم المتحضر كيفاش كتكون النقاشات كيفاش كيكون الصراع بالافكار كيفاش كيكون الهجوم فيه الشخصي وغير الشخصي. من اسبانيا ودوز على ايطاليا وفرنسا ،،،،
الاغلبية عندك او اللي دارو ليك مهزوزة. قرا غير صحف حلفاءك تعرف. حزبك غادي ويفقد الشعبية ديالو. شوف غير نتائج الانتخابات الاخيرة. حكومتك اللي انت رئيسها ما كتحكم فيها والو. مصلحة لبلاد خاص شخصيات كتهدر شخصيات كتكلم ما كتخافش. شخصيات قادرة تساعد بلادنا يدخل لنادي الدول الديموقراطية. هاد الشخصيات اكيد ماشي دكتور او شي تخربيقة اخرى.