ها علاش بنكيران رابح كلشي وظاهرة ما تعاودش: حتى وفاة امو لالة مفتاحة ولات حدث وطني. كلشي دخل لدارو حي الليمون من مستشاري الملك ووزراء وكبار رجالات الدولة وسفراء وبسطاء: قوتو فتلقائيتو فبساطتو وعندو حدس تابعو

كيفاش جنازة لالة مفتاحة تحولات لحدث وطني؟ الجواب ماشي صعيب حقاش هي بنت عبد الاله بنكيران الامين العام لحزب العدالة والتنمية رئيس الحكومة الحالية والمكلف بتشكيل الاتية. بنكيران حالة استثنائية فتاريخ الحياة السياسية المعاصرة. قوته الكبيرة تكمن في تلقائيته في خطابته. كلام بزاف وكيرتجل كلشي حتى القرارات السياسية. هاد الشي علاش كيزلق فبزافت المرات.
المغاربة ما كيشوفوش فيه اسلامي جا يفرض تصور معين للدين ومشروع مجتمعي منغلق محافظ واخا حزبو هاد الشي اللي كيأمن بيه. قوتو لكبيرة ان المغاربة البسطاء كيلقاو راسهم فيه. كيتماهاو كثيرا معاه ولمغاربة لمرفحين حتى هما حقاش كيكول اللي ما يقدروش هما يكولوه. خايفين على رزقهم. مثلا كلهم ضد التحكم وحتى واحد ما يقدر يحل فمو بل كلهم كيدعمو ممثليه بالفلوس. حقاش فلوسهم جات بدعم من المخزن وتجارتهم مع المخزن وخايفين يضيعو كلشي.
جنازة كبيرة حضروها ناس اكيد فاق توقعات حتى ولدها بنكيران. كلشي جا من جميع الاحزاب تقريبا. المثير حتى السلك الديبلوماسي جا لدارو يعزي ما بدلهاش بقى فدارو فحي الليمون بالرباط اللي كانت معاه فيها امو.
شفنا صور يستحيل شي حد يصدقهم. الياس العماري كيبكي وهو كيعنق بنكيران معزيا. بجوج عندهم علاقة قوية بزاف بزاف بالام.
بنكيران قوي بزاف ماشي حقاش خصومو ضعاف ولكن حقاش تلقائي بزاف كيحرك بالحدس ديالو بالعاطفة ديالو باحاسيسو. هاد الشي ما يمكنش دير عليه تخطيط عقلاني باش تواجهو واكثر من هاد الشي كيتكلم مزيان فصيح بالدارحة بالعربية. شافوه لمغاربة كيشطح شافوك كيبكي شافوك كيغوت شافوك كيضحك ويعاود النكات. هاد الظاهرة هي اللي خلات كل حاجة عندها علاقة بيه حدث. ما كنظنش ان العدالة والتنمية غادي يكون عندو هاد الحضور بلا بنكيران. الحزب غادي يولي حزب اخر. الة انتخابية يمكن ولكن الة بلا روح بلا ملحة.