مغربي يبحث عن زوجة صالحة ! وا فين مشاو المغاربة لي كانو كايبغيو المرا تكون بيضاء البشرة و طويلة القامة و تشتغل في قطاع التعليم او الصحة؟

شحال هادي فاش كنتي كاتقرا ركن التعارف فشي مجلة و لا جريدة مغربية كاتلقا مثلا ” شاب من آزرو ، 30 سنة يبحث عن زوجة من اصول امازيغية تقطن بآزرو او النواحي، السن لا يتجاوز 28 سنة”
” مراد من الرباط، السن ربعين سنة، ابحث عن زوجة، بيضاء البشرة، متوسطة القامة، تتقن الطبخ”
” استاذ من وجدة ، ابحث عن زوجة من اسرة محافظة تشتغل بقطاع التعليم او الصحة”
كنتي تحس بالمغاربة برغماتيين ! عارفين شنو باغيين ! و شنو خاصهم ! هذا باغيها خدامة فالتعليم باش يتبرع معاها فالعطل ! لاخور باغيها بيضاء البشرة حيت كاتعجبو الشهوبية، لاخور باغيها من اصول امازيغية باش يتفاهم معاها و مع عائلتها تكون عندهم نفس الخلفية الثقافية …
و حتى بالنسبة للبنات نفس الشيء، ” ابحث عن زوج ثري” ” ابحث عن زوج يقدر الحياة الزوجية” ” ابحث عن زوج يعمل في القطاع العام”
مؤخرا دخلت لواحد الگروب ديال الزواج فالفايسبوك لقيت لاطوندونس تبدلات ! دابا وليتي كاتلقا ” بعرور من واد زم ! ابحث عن زوجة صالحة ” ” ميلود من بومية ابحث عن زوجة صالحة ” ” نعيمة من الفقيه بن صالح ابحث عن زوج صالح” !
هاد المصطلح الجديد ! ديال ” زوجة صالحة” دخيل على المغاربة ! و كون كان غا دخيل بالربح نقولو آح و بردات ! المصيبة كاتلقا هاداك لي كاتبو براسو ماعارفش شنو باغي يقصد بيه ! ” الزوجة الصالحة” ، عبارة فضفاضة، كل واحد كايفسرها كيما عجباتو ! واخا الاغلبية بالنسبة ليهم الزوجة الصالحة هي الزوجة لي مامتقوباش و لاتجوج بيها مايحصلهاش مع الصاحب شي نهار ! كاين لي بالنسبة ليه الزوجة الصالحة هي لي تخدم و تعطيه صاليرها ! كاين لي بالنسبة ليه الزوجة الصالحة هي لي تصبر ليه على النگارة دمو و العاقيسة د ختو !كاين لي باغيها تقبل ليه على الزلط باش تتسمى زوجة صالحة. كولا واحد و شنو كايتسنا من ديك الزوجة الصالحة ! و لكن تاواحد ماكايعطي الديطاي ديال الزوجة لي باغي و كيفاش خاصها تكون باش تكون صالحة.
اثرو فيهم الخوانجية بديك الهضرة ديال ” الله يرزقنا الزوجة الصالحة” و تبناوها المغاربة.
و عوض مايبقاو برغماتيين و عارفين المعايير و الشروط لي كاتناسب كل واحد فيهم ! ولاو كلهم كايرددو نفس الجملة فحالا كلهم غاياخدو نفس المرا !
و داك شوية ديال الفردانية لي كانت شحال هادي عند كل واحد ( شويكيك ديال الفردانية) تاهي غادا و كاتغبر لصالح فحال هاد المصطلحات المبتذلة لي جايانا من هوك جيهت السعودية ! و لي كاتلغي الاختيار و الارادة ديالك كفرد و كاتردد مع القطيع ” بغيت زوجة صالحة”