مانسمحش لنور الدين الخماري لي دا ليا ستين درهم فبورناوت ! من فوقاش السيرور فكازا بيبض و شعيرو رطيطب و كايعيط ليك فالزنقة " سيدي تسيري"‎

—
قبل مانمشي نتفرج فالبورناوت تفرجت فلابونض ضانونص و بان ليا مابيهش ! الممثلين كايعجبوني ! فايتة مفرجة فيهم ! شفت شي فيديوات ديال المخرج نور الدين الخماري كايهضر على الفيلم والأفكار لي بغا يناقش و قلت بوركوا با ؟! تفرجت فكازا نيگرا و عجبني بقيت موراه شحال كانعاود اللقطة فبار "اوتو فا بيان" لي فيها الممثلة راوية كاضارب مع سكايري و كاتقوليه " سير قود ! مالي مسيفطا ليك عودة عرگانة" و تفرجت فالزيرو و تاهوا عجبني ! و فراسي كان احتمال كبير أني غانخرج من بورناوت وانا راضية على الفيلم و راضية على ديك ستين درهم لي خسرتها من جيبي و ساعتاين لي خسرتها من وقتي.
لاصال ويت عامرة، كلشي جاي يتفرج فالبورناوت ! واخا گاع هادوك لي جايين عارفينو غايكون عامر ب"تخسار الهضرة" و لادرتي معاهم شي صونداج سولتيهم واش هوما مع أو ضد تخسار الهضرة فالأفلام غايجاوبوك " لا آ خويا بغينا الفن النظيف" خلصو ستين درهم ديال التيكي و جاو يتفرجو كوميم كأي مغربي سكيزوفريني يحترم نفسه! آخر مرة مشيت للميگاراما هادي شي شهورا كانو مازال دوك الفوطويات حومر لي كاضرب منهم ريحة الغمال و الوسخ و التقيا ! هاد الفوطويات ديال الجلد باينين جداد و كونفورطابل و الأهم مافيهمش ريحة التقيا ! عزلت بلاصة مزيانة الوسط و جلست مشهية نتفرج ففيلم مغربي كايشبه ليا ! كايهضر فحال هضرتي ! و كانتفكر كازا نيگرا و‌كانقول اليوم الفرااااجااااااا
و بدا الفيلم
و للأسف بداو الصدمات مع الدخلة باش جاي باش داير
أولا بسم الله الرحمن الرحيم أما بعد:
بالنسبة للكاستينغ كانو اخطاء فادحة كاتخليك كمشاهد ماتيقش الفيلم !الشكل ديال الممثل و لافيزيونومي ديالو خاصها تكون كاتشبه للدور و كيما مايمكنش تجيب بشرى أهريش تلعب الدور ديال بنت ليسي ليوطي و لا تجيب فركوس يلعب الدور ديال طبيب كايدوي بالفرونسي! مايمكنش تجيب الدري الصغير ببشرة بيضاء نقية ! و شعر رطب زوين ! و سنينات مقادين باين مولاهم كايسوانيهم عند الدونتيست يلعب دور "سيرور" ساكن فالكاريان! سيرور كايعيط على الناس يسيريو عندو بصوت حنون " سيدي ، تسيري" ! هاويلي على "سيدي ! تسيري"! السيرورا راه كايكونو حرشين ! وجهم واكلاه الشمش و المضاربات لي كايضلو يتساراو فيها ! كايجي عندك "ختشي تسيري" " خويات تسيري"، ماكاينش التكلمين فهادشي !
البنت لي لعبات دور طالبة فكلية الطب ! عندها صعوبة مع الدارجة، باينة خدمات بزاف على الدارجة ديالها ولكن اللكنة الزماگرية حاضرة عندها بقوة لدرجة كاتخليك صعيب عليك تتخايلها مضطرة تقحب باش تعيش! حيت غالبا فالمغرب عندنا لي ماكايعرفوش يهضرو بالدارجة كايكونو واليديهم موفرين ليهم عومار صحيح باش يقراو و كايقوليها باها " غير قراي لينا آ بنتي صوفيا و ماضربي حسبة حتى لحاجة لي بغيتيها باباك يجيبها ليك" ! وي كاينين عرام ديال الطالبات كايقحبو ! و لكن ماكايشبهوش لهاديك لي ختاريتي نتا !كان عليك ضرب دويرة فمدينة العرفان فالرباط و لا حدا لافاك ديال كازا و لا حدا شي حي جامعي فمراكش و لا فاس باش تشوف بروفيلات الطالبات لي كايقحبو باش يضبرو على شي فيكيتيم يعشيهم ! و لا يغديهم ! و لا يسيفط شي خمسين درهم روشارج ! الطالبات لي تقدر تنيكهم لا خلصتي عليهم شي صالاد سيزار و شي بيتزا و لا فأحسن الأحوال شي ريحة شانيل.
بالاضافة لهادشي جاني المخرج فحالا خدا مجموعة ديال اللقطات كانشوفوهم ديما فالافلام الميريكانية! لقطات طلعو ليا فراسي ! و عاود حطهم !
گاع الممثلين واقفين ساهيين فشي شرجم و كايلقيو الحوار ديالهم بلا مايشوفو فالممثل لاخور! طلعات لينا هاد اللقطة فراسنا ! راه فالحياة الطبيعية حتى واحد بعقلو ماكايعطي بالظهر لشي حد فاش كايبغي يهضر معاهو خصوصا لاكان كاعي عليه ! تعطيه بالظهر ! تگوليه شي حاجة ماعاجباهش ! ينزل عليك بشي فاز و لاحديدة للراس فين غانوليو؟ اذن الله يرحم الواليدين هذا نداء لگاع المخرجين المغاربة عافاكم لاما باراكا علينا من هاد اللقطة ديال ممثل عاطي بالظهر لممثل و كايهضر معاه !
فلقطة أخرى الممثلة كاتغتاصب و كاتمشي تجري دخل لقهوة شعبية ( شوف لاكويرونص كي دايرة) باش تغسل طبونها بالما بواحد الطريقة هيستيرية زعما راه كاتحس براسها موسخة ( اللقطة ديال الاغتصاب و الدوش لي كاتعاود مليون مرة فالافلام) ! تا هاد اللقطة ديال الدوش مورا الاغتصاب ! الله يرحم الواليدين لاما باراكا منها راه حفظناها ولينا كانعرفو گاع بلي مورا الاغتصاب كايجي الاغتسال. صافي؟ ميرسي بوكو .
و اللقطة ديال واحد لاباس عليه فاش غايبغي يدير بليزير فعائلة مقودة عليهم غايديهم للريسطورون ! و عندك زعما الهيماج داخلين للريسطو و السرباي كايقرا عليهم الموني بالفرونسي و هوما مافاهمينش ! هاد اللقطة لي دارها المخرج باش زعما يعطي طابع كوميدي للفيلم أصلا طلعات فالراس! شفناها و شفناها و شفناها ! دارها سعيد الناصري قبل منك و داروها مخرجين بزاف ! طلعات فالراس ! واك واك طلعات فالراس!
بلا شي لقطات سرياليين مايمكنش انسان طبيعي يقبلهم
فواحد اللقطة الطبيبة كاتلقا جوج ديال السيرورا كايضاربو و كاتحط صاكها فالارض ( ايه كاتحطو فالارض) شفتي العباطة كي دايرة و كدخل باش تفكهم! و فاش كاتفكهم واحد كايطير ليها بالصاك و كايعلق ! واش شفتو العباطة كي دايرة
ايوا لا بلاتي ! مازال النيفو ديال العباطة غادي يطلع حيت فاش كاتلقا الطبيبة بلي الصاك تشفر ! غادي تاخد لداك السيرور لي بقا قريب ليها عشرين درهم لي فجيبو و البواطة ديال السيراج و غاتقوليه سير جيب ليا صاكي ! انا كانساينك هنا ! و لا ماغاتاخدش فلوسك ( عشرين درهم) و البواطة ديالك !
هههههه ! واش كاتفلاو علينا ؟
كاين شي وحدة فالعالم غاتشفر و غايكون عندها هاد الريفليكس ديال دير الشونطاج لواحد من صحاب الشفار ببواطة ديال السيراج ؟
ايوا هاد الطبيبة مكلخة على هاد الحساب لاماگالش ليها راسها بلي داك الشمكار كاين احتمال كبير يسمح ليها فديك عشرين درهم وبواطة د السيراج و يمشي يدير قسم درم لداك الصاك مع الشمكار لاخر؟
شفتو النيفو ديال العباطة !
و بلاتي مازااااال !
الطبيبة غاتگلس تساين من نيتها يرد ليها الشميكير الصاك ! و خلال هاد الوقت الشميكير غايمشي يقلب على صاحبو و غادي يلقاه و غادي ياخد من عندو الصاك و غادي يضاربو مع واحد البيدوفيل و غادي يمشيو للبيار و تاااااغايساليو هادشي كامل عاد غايرجعو الصاك للطبيبة و طبعا الطبيبة بقات كاتساين هاد المدة كاملة يرجع ليها الصاك حيت شادة عندها بواطة ديال السيراج رهينة !
هنا الصراحة عرفت بلي الفيلم تحت شعار كور و عطي للعور
شي لقطات بعدا مايمكنش يطراو فالمغرب:
طبيبة داخلية خدامة فكلينيك(ممنوع)! الأطباء الداخليين كايخدمو فالمستشفيات الجامعية فحال ميريزگو ! كان خاص الطبيبة تبان فشي سبيطار ديال الدولة ماشي حيت المخرج باغي يبين كازا مودين غايرض تا السبيطار موديرن بزز !
الصراحة عييت مانكتب و بغيت نمشي نطيب العشا أما راه الفيلم كامل شبعان أخطاء و روينة و تخربيق ! انا بان ليا المخرج بغا يهضر على بزاف ديال المواضيع و لكن فاللخر تا موضوع ماهضر عليه مقاد.
دوماج ! فريمو ! دوماج مشات ليا ستين درهم و ساعتاين من وقتي ففيلم جاني باكلي !
وي باكلي!
"وافو" قالت ليا بلي الخماري فواحد الحوار قال بلي التصوير ديال هاد الفيلم خدا ليه ثلت سنين ! الصراحة ماقلبتش باش نتأكد و لكن تصدمت !
ثلت سنين باش تخرج فيلم بهاد المستوى الهزيل !
علاش آ الخماري علاش؟
علاش جيتي تالخر و خريتي علاش؟
و ديك طناشرميا ديالي لي ديتو ليا و الله مانسمح ليكم فيها !