لي لاباس عليهم كايتجوجو بلي لاباس عليهم و المزاليط كايتجوجو بالمزاليط و كايبقاو صحاب الگروبات فالفايسبوك كايحنشو فشي آنونصات كايتشايهو‎

شحال هادي كانو دوك لي قارين شوية و باغين يتجوجو كايديرو آنونص فشي مجلة و لا جريدة، دابا ولاو الگروبات‌ ديال الجواج غي هوما فالفايسبوك ! كاينين وحدين خاصين مثلا بالأطباء لي باغين يتزوجو بالطبيبات و لا بالمهندسين لي باغين يتزوجو بالمهندسات و هادشي عادي و طبيعي فجميع المجتمعات كاتلقا الناس من نفس الطبقة الاجتماعية كايقلبو يتزوجو من شي واحد فحالهم تربى فنفس المستوى و كايشوف الحياة بنفس الشكل. غالبا المرفحين كايتجوجو ببعضياتهم و المزاليط ببعضياتهم ! غير هوا بلادي هادي وانا عارفاها و عارفة طبعا بلي البنجلونيين و البنجلونيات و البنيسيين و البنيسيات و العراقيين و العراقيات و الفاسي الفهريين و الفاسي الفهريات ماكايحتاجوش لگروبات الفايسبوك باش يتجوجو ! كايكونو أصلا كبرو مع بعضياتهم ! تلاقاو فنفس المدرسة ! لعبو التنس و لا لاضونس كلاسيك فنفس الكلوب ! سافرو اونسوبل لفرانسا و لا ميريكان يقراو، نهار كايبغيو يتجوجو بنيس كايتناسب مع العلمي و بنجلون مع العراقي و بنشقرون مع الفاسي الفهري وكاتلقا شي فيديو ديال شي عراسية فاعلة تاركة فگوود "شاهد كيف احتفل الميلياردير بنجلون بزواج نجلته" و نفس الشيء بالنسبة للمزاليط تاهوما مامحتاجينش للگروبات ديال فايسبوك، كايتلاقا معاها فشي طوبيس ولا طاكسي كبير، عنقها، تخشات فيه، تشامو ريحة البيطان النهار الأول و الفيرومونات دارو خدمتهم و كايساليوها بشي عراسية فوق السطح متقلين الباش بالبوديزات و حاطين جوج دجاجات فالطبسيل و شي برهوش مطلس كيلو ديال الجيل لشعرو شاد الميكرو "ايه ايه الله ! واحد تنين ! طيست طيست" داها و داها و الله ايما خلاها و داتو و داتو و الله ايما خلاتو…و شكون كايبقا تالف فالنص ؟
كايبقاو الهاربون من الزلط (أبناء الفقراء لي ترقعو شوية) كايحنشو فليزانونص وسط الگروبات فالفايسبوك و يكتبو فاللخر ديك " pas sérieux s'abstenir" ! كاتلقا ولد المزلوط لي حن عليه الله و ولا أستاذ و مهندس و تيكنيسيان و طبيب كايقلب على النصف الآخر فگروب "مهندسات عازبات" و بنت المزلوط لي حن عليها الله و ولات طبيبة كاتقلب على البعل نتاعها المستقبلي فگروب" زواج بين الأطباء" ! و آراك للتحناش و آراك للأحلام !
أنا المشكل الوحيد لي عندي مع هاد ليزانونص هوا التشابه الكبير لي كاين بيناتهم لدرجة كاتخايل بلي المغاربة كاملين باغين ينكحو نفس الشخص ! والو ! حتى فالجواج خاصنا نتشابهو ! نفس الميكانيزمات ! نفس الماركوتينغ البدائي !
گاع الرجال باغينها محتجبة و متدينة و جميلة و گاع العيالات باغينو لديه مدخول قار و متدين و خلوق و لا يقرب الخمر و لا المحرمات، و كاينين شي وحدين مازال عايشين فالعصر الجوراسي الأول ديال ما قبل اختراع الباطو(ديال مول الشاطو) كايزيدو ديك " حبذا لو كانت من أسرة سوسية" ! واخا آ خويا ! دابا نحفرو ليك القبر ديال الملكة ديهيا و دي الهيكل العظمي ديالها عرس بيه.
نفس لانونص كاتعاود ! نفس الشروط كايطلبهم كلشي ! خلوق ؟ واش كاين شي حد آ بنت الهبيلة غايقولك أنا ماشي خلوق دونك بلا مانجاوب على هاد لانونص ! "جميلة" واش كاين آ ولد الهبيلة شي وحدة ماكاتشوفش راسها جميلة ؟
زيرو ابداع لا فالطريقة لي كايبيع بيها الواحد راسو لا فالطريقة لي كايوصف بيها شنو باغي من داك شريك الحياة، عندك واحد خمسطاش و لا عشرين كلمة فكل آنونص 99 % فيها معاودة، لا كانت مرا لي كاتباها راها كاتبيع الزين و الأخلاق و التدين ديالها و لاكان راجل لي حاطها كايبيع خدمتو و المدخول القار.
و كلشي كايبيع أحسن صورة ليه و لي بعيدة طبعا عن الصورة الحقيقية لي كاتبان من بعد فاش كايدوزو من مرحلة لانونص لمرحلة تعميق العلاقة …
تما فين كايتفرش الانسان الخلوق وا شحال خلوق !
و كاتبان حقيقة لي على قدر لابأس به من الجمال شحال فعلا لابأس بها…
وفاللخر كايجي شي بوخنونة يا الله مسح صباعو من المرقة يكتب ليهم " لاعطاك راجلك عشرة دراهم و قالك صايبي العشا شنو تقدري تصايبي بيها ؟"
و كاينوضو الهبيلات يتزاحمو يكومونطيو باش يبانو زعما اقتصاديات و حادگات ! "غانشري الفلفلة بستين و رابعة د الدجاج بمية …"
صافي ؟ هذا هو منتهى الطموح ديالك ؟ هادشي لاش باغا تجوجي ؟ باش طيبي لينا گاميلة د الدجاج زفر.
ايوا الله يخلف عليك