سكوب. كلشي اللي محتاجين تعرفوه على 5 قنوات ميردوخ المغرب الجديد يونس بومهدي: بشحال تقام المشروع واش فيه. خدا ترخيص جوج وحط ملفات 3 زائد اذاعة فالصحرا

حصلت “هيت راديو” رسميا على ترخيص من الهاكا لاطلاق قناتين تلفزيونيتين موضوعيتين سيتم اطلاقهما عبر القمر الصناعي بالاضافة الى اذاعة. طبعا هاد القناتين جزء من مشروع تلفزيوني فيه 3 قنوات اخرى.
المدير العام للمجموعة يونس بومهدي قال ان الطلب تم التقدم به ف2009 واضاف ان هاد التراخيص”ثمرة العمل المستمر لفريق هيت راديو”
القناة الاولى مخصصة للاطفال وفق بيان المجموعة والثانية وثائقية موجهة للبالغين والمراهقين قال انها ستكون للاكتشاف والثقافة
وقال انه يرتقب اطلاقهما اواخر 2019 وان هذا المشروع ضمن باقة من 3 قنوات موضوعاتية سيتم تقديم ملفاتها على الهاكا قريبا
حسب معطيات حصلت عليها “كود” فان اذاعة شمس اللي خدات الترخيص غادية تكون موسيقية. غادية تبث فالاحواض الجنوبية. من سوس حتى الحدود الموريتانية اي انها غادية تغطي 4 جهات فالمغرب وهي سوس ماسة درعة وجهة كلميم واد نون وجهة العيون الساقية الحمرا وجهة الداخلة وادي الذهب. هدفها “نوع من التلاحق الثقافي” لموسيقى “تتغنى بالطبيعة وبطولات المغرب” و”تقدم التراث المحلي من حساني وغيره” وتدعمه.
طبعا اللي خدم فالصحرا هدفو سياسي واخا ما يديرهاش. لهاد السبب فاذاعة شمس” غادية تبث كذلك فموريتانيا. هدفها خلق جبهة جديدة ضد المد الاعلامي الكبير للبوليساريو فالمنطقة. هنا الدولة غادية تبقى بعيدة وحتى السياسة٬ كلشي غادي يدار بالثقافة بالفن. هاد الشي تعطلو فيه لمغاربة بزاف.
بالنسبة للقناتين الفضائتين. اللولى غادية تكون للاطفال بحال كاع القنوات الخاصة بهاد الفئة غادية تكون برمجة مختلفة فيها المغربي وفيها الاجنبي وباللغات الثلاث بحالها بحال القناة الفضائية الثانية للاستكشاف اللي غادية تكون بحال شي “ناسيونال جيوگرافي” مغربية. فيها الربورطاج بزاف. الثقافة حاضرة والطبيعة حتى هي. اللغات هي العربية والامازيغية والفرنسية كيف اوضح ل”كود” الرئيس المدير العام للمشروع.
هاد المشاريع كانت المجموعة اكدت باللي غادي يتم اطلاقهم فالعام الجاي. طبعا هاد المشاريع الاعلامية جزء من مجموعة. باقية 3 قنوات تقدمات المجموعة بطلب للهاكا باش يتم الترخيص ليهم. وحدة للموسيقى وهو تخصص للاذاعة “هيت راديو” والثانية ديال الكوزينة. الطبخ كلها طبخ. والثالثة خاصة بالرياضات القاصحة بحال السورف….. الرياضات اللي كتحتاج لقوة بدنية كبيرة.
حسب الرئيس المدير العام للمجموعة بومهدي ل”كود” فان كاع المشاريع غادية تقدم “مغرب منفاتح على العالم وحداثي”.
القيمة الاجمالية لهاد لمشاريع القنوات الفضائية كلها 50 مليون درهم يوضح مصدر “كود”.
طبعا هاد المشاريع غادية تكون فالمغرب ومع اختيار اللغات اكيد غادي يكون عندها حضور خاصة فافريقيا٬ كيف دار مع “هيت راديو”.