خايفين يتشوطو لان الملك غادي يعيد فالشمال. عمدة تطوان تبع عمدة طنجة: تشواط الريوس فالشوارع ممنوع

عمدة تطوان محمد ادعمار تبع عمدة طنجة اللي من نفس الحزب: العدالة والتنمية٬ وقرر يمنع تشواط ريوس لحوالا فالشوارع. قرار عمدة تطوان كان اذكى من قرار عمدة طنجة اللي بان عليه الخوف فقرارو.
اولا القرار ما وقعوش ادعمار بل نائبو سعيدة بنزينة٬ وثانيا حقاش ما منعش التشواط فالمدينة وصافي٬ بحال كيف دار عمدة طنجة٬ بل اكد ف”قرار تنظيمي مؤقت” يوم 08 غشت 2019 انه “يمنع منعا كليا شي رؤوس الاضاحي بمختلف الشوارع والازقة والطرقات بالمدينة بتراب الجماعة خارج الاماكن المحددة رسميا بذلك ».
وزاد و« على الراغبين في الاستفاذة من هذه العملية الحصول على اذن من السلطة المحلية ». اي غاديين يخصصو بلاصة للي كيدبر على مصيريف فالعيد من التشواط.
واضاف القرار التنظيمي المؤقت للمجلس البلدي لتطوان “وان هاد القرار يدخل حيز التنفيذ ابتداء من تاريخ الصدور ويعهد الى السلطة المحلية ومصالح الامن والمصالح الجماعية المختصة بتنفيذه كل في دائرة اختصاصه ».
واضاف ن “عملية شي الرؤوس ستتم حصرا داخل النقطة المحددة من طرف الجماعة واللي فيها شروط المحافظة على النظافة والسلامة والصحة العمومية”.
التبرير الظاهر بحال ديال طنجة بحال ديال تطوان هو “ضمان امن وسلامج المرور والنظافة والصحة العمومية” لكن فالواقع وكيف قالت “كود” البارح ان القرار اتخذه والي جهة تطوان طنجة محمد مهيدية وهادو غير طبقوه. السبب كيف شرحات “كود” هو ان الملك محمد السادس غادي يدوز عيدو فطنجة وطبعا العمدة وغيرو خايفين علي يتشوطو الى ريوس لحوالا تشوطو فالشوارع كيف ديما. اللي خاف نجا.