قتل السياسة زمن بنعرفة. كيفاش “الانقلاب” على بنكيران وصلنا لمطالب المقاطعة وكيفاش رئيس حكومة كيتخبى فمجلس المنافسة وكيتفرج

دابا نتصورو ان عبد الاله بنكيران هو رئيس الحكومة اليوم ماشي بن عرفة اللي دار والو. ما. ربح حزبو فالانتخابات ما طفرو من غير داك الشي اللي عارفينو لمغاربة ديال يلوحو بنكيران للتوش مع صحابو فالحزب.
لو ان بنكيران اليوم كاين فالحكومة ووقع مشكل بحال اللي كاين دابا ديال دعوات مقاطعة 3 شركات =المحروقات والحليب والماء= دون غيرها. واش كان غادي يسكت. واش كنتو تصورو انو يدوز مجلس حكومي وما يقول والو. اكيد اللا. كان غادي يتكلم. ياخد موقف. ما يخليش الجمود يبقى. ما يخليش كلشي يهدر. طبعا ايلى بان ليه هاد الشي عبثي وتخربيق حقاش ما واضحش غادي يخرج ويفرش كلشي وما يتسوقش للضرب اللي غادي يتلقاه.
رجل سياسة عندو الجرأة يهدر يتكلم ماشي بحال بنعرفة اليوم. ساكت وقتل السياسة اللي كان حياها بنكيران. مخلي الفراغ. حتى فاش خرج فهاد القضية ديال المقاطعة اعتبرها “مؤامرة” ما يصدقها حد. بوحدو عندو الجرأة يدير تصريحات مماثلة
رئيس الحكومة ديال اليوم رد على هاد الشي عبر الناطق الرسمي باسم الحكومة بالحديث عن “مجلس المنافسة”. قال باللي خدام باش يخرج هاد مجلس المنافسة وانو غادي يتم تعزيز حماية المستهلك عبر تعزيز المنظومة القانونية. طبعا المثير فهاد الشي انو هاد الموضوع ما تناقشش كاع. غياب وزراء المالية والاقتصاد محمد بوسعيد والفلاحة والصيد البحري عزيز اخنوش والصناعة والتجارة والتكنلوجيات الحديثة مولاي حفيظ العلمي كلهم عن مجلس اليوم وفق ما علمته “كود” يقدر يخلي هاد الموضوع ما يتارش. لكن كيفاش حملة بهاد التنظيم بهاد التعبئة ما حركات فرئيس الحكومة والو.
هاد الشي كيزيد يقوي حركات احتجاجية وهاد المرة تنزل فالشارع. ما كاينش اللي غادي يواجهها لان بنعرفة غادي يتخبى كيف ديما ويخلي الدولة مطايفة معاها. كنقصد بالدولة لقصر والاجهزة التابعة للدولة.
فهاد اللحظات الصعيبة خاص رئيس حكومة قوي وشجاع ماشي امثال بنعرفة. خاص السياسة ترجع. قتلها ثمنو غالي بزاف