تبرهيش بلهندة وحمد الله…خاليلوزيتش مقلق من التسيب لي كاين فالمنتخب

وحيد خاليلوزيتش، مدرب المنتخب المغربي، مقلق بزاف من تبرهيش ديال يونس بلهندة وعبد الرزاق حمد الله.
خاليلوزيتش سمع بهادشي لي واقع بين بلهندة وحمد الله، ومعجبوش التصرف، لي دار بلهندة فاش حط سطوري كيتهكم على حمد الله.
مصدر “كود”، أكد أن المدرب البوسني ماراضيش بهاد التسيب، لي واقع فالمنتخب، واحد كيتهكم على صاحبو والآخر كيهدد باش يرد. هادشي كان عادي مع هيرفي رونار، لكن مع خاليلوزيتش الوضع مختلف.
وحسب المصدر نفسه، أن المدرب البوسني ناوي يدخل بقوة للحد من الفوضى، لي كاينة في المنتخب، وغادي يفرض ضوابط صارمة لمنع مثل هاد التصرفات الصبيانية.
الغريب هاد شي وقع بعد 20 يوم فقط من تعيين خاليلوزيتش مدربا للمنتخب، ما خلاوه ختا يسخن بلاصتو، وبدات المشاكل كتنزل عليه ديال اللعابة لي المفروض يوضعوا مصلحة قميص المنتخب فوق كل اعتبار.
ما بقاش المشكل عند المدرب البوسني فقط في تكوين منتخب قوي، لكن هناك ما هو أعمق لي خاص يتعالج بسرعة مثل هادشي ديال الدراري الصغار لي وقع بين لاعبين قبل المشاركة في كأس إفريقيا ومازال تداعياته مستمرة للأسف.