حكيمي حيح فماتش فرايبورگ.. ماركا 3 فأقل من سيمانة

أشرف حكيمي، مدافع المنتخب المغربي وبروسيا دورتموند، ماركا اليوم السبت مرة اخرى بيت، فالماتش، لي جمع فريقو بفرايپوگ، برسم مباريات الأسبوع السابع من الدوري الألماني الدرجة الأولى.
الماتش سالا بجوج لجوج، بعدما كان دورتموند متقدما فالنتيجة.
حكيمي ماركا الهدف الثاني فالدقيقة 67، بعد تسديدة قوية، وهو الهدف الثالث ليه فأقل من سيمانة، بعدما سجل هدفين فماتش سلافيا براگ نهار الأربعاء لي فات، ضمن الجولة الثانية من مسابقة عصبة الأبطال الأوروبية.
حكيمي ارجع واحد من اللاعبين الأساسيين، لي كايعتمد عليهم وحيد خاليلوزيتش، مدرب المنتخب المغربي.
الظهير الأيمن لبروسيا دورتموند غادي يكون حاضر فالماتشات بجوج، لي غادي يلعبهم المنتخب الوطني أمام ليبيا نهار الجمعة جاية بالملعب الشرفي بوجدة والگابون نهار 18 فأكتوبر الجاري بملعب طنجة. وهاد الماتشات بجوج كيدخلو فإطار الأستعدادات للاستحقاقات القادمة.