30 كاميرا و2 طيرات دون طيار “درون” لنقل ديربي الرجاء البيضاوي وغريمه الوداد البيضاوي اليوم السبت بملعب مركب محمد الخامس في الدارالبيضاء مع السبعة ديال العشية، برسم ذهاب ثمن نهائي كأس محمد السادس للأندية العربية. الكاميرات موزعة داخل الملعب وخارجه. مصدر مقرب أكد ل”كود”، أن النقل التلفزيوني لهاد الديربي غادي يكون بحال نهائي كأس العالم في روسيا 2018، ولي تستعملات فيه 30 كاميرا باش يكون التصوير على اعلى مستوى من الاحترافية. من جهة أخرى، يتفوق الرجاء البيضاوي على منافسه الوداد البيضاوي من حيث عدد الانتصارات والأهداف سواء في البطولة وكأس العرش. الرجاء عندو 37 انتصار ومقابل 30 للوداد و61 تعادل و109 هدف للرجا و98 للوداد. هادشي في البطولة. أما ف كأس العرش فمن اصل 16 لماتش، ربح الرجا ف 6 وخسر ف 5 وتعادل الفريقان ف 5. الرجاء عندو رقم اخر هو الهداف التاريخي الديربي، لي مازال عند الرجاوي سعيد غاندي ومحمد بنشريفة هو أكثر اللاعبين تسجيلا لأهداف الوداد ف الديربي. اما محمد اولحاج هو صاحب اكبر عدد الديربيات لي لعب مع الرجا، متبوعا بالحارس نادر المياغري، لي لعب مع الوداد 19 لديربي. سعيد الناصيري، رئيس الوداد البيضاوي تفوق على غريمو جواد الزيات رئيس الرجا هاد المرة ف البريم، بعدما خصص لكل لاعب 6 ديال المليون الا ربحو الديربي، في الوقت لي خصص الزيات 4 ديال المليون لكل لعاب الا تربح الديربي.
