نصاب مشروع “الأعراس” دالهرهورة صدق واكل الناس ف3 دالمليار.. ضحايا جداد بانو والتحقيق مستمر

فجلسة التحقيق اللي كانت لبارح فملف مشروع “الأعراس” اللي كان لونصاه (ه.م)، مول الجمعية الإيكولوجية (إ.س)، بانو ضحايا جداد جاو يقدمو شكايات جديدة فالموضوع، واللي تجاوز العدد ديالهم لحد الآن 100 مشتكي، وبلغات قيمة الفلوس المنهوبة سقف 3 دالمليار دالسنتيم، حسب إفادة أغلبهم.
واستمع قاضي التحقيق لرئيس الجمعية وكذلك لشريكتو فالقضية وأمينة مالو (إ.غ)، واقضى بالاستمرار فمتابعتو فحالة اعتقال، فالوقت اللي تابع فيه أمينة المال فحالة سراح بعدما عطات كفالة مالية.
وحدد قاضي التحقيق تاريخ الجلسة المقبلة ف12 فشهر مارس، باش يستمع للمطالبين بالحق المدني فالملف.
وللإشارة فالمنخرطين فجمعية (إ.س) كانوا عطاو ل(ه.م) مبالغ مالية كبيرة كتسبيق باش يشريو إقامات بمشروع “الأعراس” بالهرهورة، حتى تبين ليهم من بعد أن مول المشروع مزال ما شرا الثلثين من الأرض اللي غيقوم عليها المشروع، وبقا كيتماطل على الشروع فالبناء من 2013 حتى لدابا.
رغم هذشي، (ه.م) مازال كينكر التهم الموجهة ليه، وكيعتبر أن الشكايات “كيدية”، وأن الجمعية الإيكولوجية ديالو معروفة وعندها مشاريع كثيرة ومايمكنش ينصب على الناس بهذ السهولة.