النصاب اللي كلا الناس ف2 ملاير ونص فمشروع وهمي فالهروهورة تشد فالحبس

قرر قاضي التحقيق فالمحكمة الابتدائية بتمارة، اليوم الأربعاء 19 فبراير، متابعة (ه.م) فحالة اعتقال، على خلفية جرائم النصب والاحتيال على مجموعة من المنخرطين فالجمعية ديالو الإيكولوجية (إ.س) فأكثر من جوج مليار و500 مليون سنتيم، اللي كان جمعها بعدما خدا تسبيقهم باش يشريو برطمات فمشروع اكتشفوا من بعد أنه وهمي فمدينة هرهورة.
وقرر قاضي التحقيق إحالة (ه.م) على سجن العرجات فسلا، فالوقت اللي قرر متابعة شريكتو (إ.غ) في حالة سراح، وكان سبقليه غلق الحدود فجهوم بحوج بعدما خدا حجز باسبوراتهم فالجلسة اللي فاتت.
واستمع قاضي التحقيق، فجلسة اليوم، لمجموعة من المنخرطين، اللي أكدوا بللي مول الجمعية الإيكولوجية كان أسسها سنة 2013، وطلب من مجموعة من الأطر والأطباء والمهندسين اللي بغاو يشريو برطمات، باش ينخارطو فالجمعية، ويأديو مقابل لهذشي مبلغ مالي كبير.
وزادو المنخرطين كيقولو للقاضي بللي الجمعية منذ تأسيسها عمرها نجزات شي مشروع سكني من المشاريع اللي تم التسويق ليها، وهذشي كينطبق كذلك على مشروع “الأعراس” الوهمي اللي تدار ف2015، واللي عطاو فيه مجموعة من المنخرطين، واللي كيتجاوز العدد ديالهم 70 منخرط، أموال باهضة كتسبيق كتراوح بين 50 مليون و150 مليون لكل واحد منهم، فالوقت اللي مول المشروع مازال ما استكمل شراء الارض اللي غيبني فيها المشروع ديالو.
وقرر قاضي التحقيق متابعة التحقيق التفصيلي مع المشتكى بهما (ه.م) و (إ.غ) فالجلسة المقبلة اللي تحدد تاريخها ف27 فبراير 2020.