هبة الدولة مشات. كيفاش لا النيابة العامة لا وزارة الصحة لا نقابة الاطباء لا هيئة الرشوة ما حلوش فمهم على اتهام ابو زعيتر وسط ابن سينا للاطباء بالرشوة؟

ابو زعيتر ولى كيحكم. مول المجحوم اللي حرك الدولة كاملة باش يلقاوه ليه قبل ايام٬ مشى لمستعجلات المستشفى الجامعي بن سينا بالرباط هاد السيمانا ودخل وحيح. فالفيديو ديال المستعجلات اللي نشراتو “شوف تيفي” كيبان لينا هاد البوكسور كيدور بحال ايلى كيدور فدار بوه. وقاحة ما بعدها وقاحة. جاي لصبيطار ببورش وشي تافه بحالو جاي للومبورگيني بلباس رياضي. غير جولاتهم شوهة للدولة.
شوهة لكاع اللي دارو المغرب. شكون دابا غادي يحتارم دولة ومع الاعلان عن اول حالات “كورونا فيروس” عندنا كاين بوكسور كيدور وكيعطي الاوامر.
الفيديو قدمو باللي مبعوث. لكن الخطير هي باش قال للطبيبة اللي كانت كتعالج مرا ودخل عندها بوقاحة٬ “انتوما غير مرتشين”. زاد وقال “انا جاي فزيارة تفقدية باللي عرفت باللي كورونا وصل للمغرب”.
دابا كاين جوجت الامور. هاد بنادم نتاحل صفة. اللي كيدير الزيارات التفقدية وهو رئيس الدولة ووزير الصحة ومدراء بهاد الوزارة اللي مكلفين بالمستشفشيات الجامعية حتى رئيس الحكومة مع الشخصية الضعيفة اللي عندو ما يقدرش يديرها. الامر الثاني هو اتهامو للاطباء بالرشوة. هنا خاص النيابة العامة تحرك دعوة وهيئة محاربة الرشوة تدخل طرف فهاد الشي.
لحد الان ما شفنا لا نقابة الاطباء دافع على سمعتها على وزارة الصحة تدافع على اطرها فهاد الوقت الحساس لا حتى حد.
خاص فتح قضية فهاد الاتهامات فهاد الانتحال. راه هبة الدولة اللي تمسات