باش يتحدد تأثير “كورونا” على الاقتصاد.. رئيس الباطرونا غايدير اجتماع مع الاتحادات القطاعية والجهوية الخميس الجاي

عرفات “كود” من مصادرها الخاصة بللي شكيب العلج، رئيس الاتحاد العام لمقاولات المغرب، غادي يدير اجتماع مغلق، نهار الخميس، مع كَاع الفدراليات القطاعية والاتحادات الجهوية، باش يناقشوا الأضرار اللي تسبب فيها انتشاف فيروس “كورونا” المستجد على الاقتصاد الوطني.
وحسب المصادر، مازال الصورة عند الباطرونا مواضحاش مزيان على الخسائر اللي تكبدها المغرب بسبب الفيروس، من بعد ما تم تعليق الرحلات من وإلى الشينوا وإيطاليا، الإضافة لإلغاء وتأجيل مجموعة من المعارض والمهرجانات اللي كانت كتساهم فإنعاش اقتصاد البلاد من زوايا مختلف.
الباطرونا ممكن تكون تصور واضح ومضبوط على المشاكل الاقتصادية اللي يقدر يكون تسبب فيها الفيروس، وهذشي من بعد ما تاخذ خلاصات ونتائج الاتحادات القطاعية والجهوية، وكيفاش كل اتحاد تضرر من هذ الفيروس.
وحسب المصادر نفسها، فالجمعة اللي فاتت دار الاتحاد العام لمقاولات المغرب اجتماع مع رئيس الحكومة، سعد الدين العثماني، وتم الاتفاق على إنشاء لجنة ديال اليقظة الاستراتيجية اللي غادي تتبع كَاع القضايا والمشاكل اللي كتاثر على النسيج الاقتصادي، وخصوصا اللي عندها طابع استعجالي.
وأكدات بللي هذ اللجنة غاتكون عندها حكامة مشتركة بين الحكومة والباطرونا، وغادي تتكلف باش تدير متابعات لوضعية الاقطاع الاقتصادي،وغادي تعاجل مواضيع استعجالية بحال استفحال وباء “كورونا”، ومشكل الجفاف وتداعياتو على الاقتصاد.