المخابرات الأمريكية كتحقق فمصدر كورونا وكترجح تكون الشينوا دارتو مخبريا وانتشرليها عن طريق الخطأ

مسؤول فالمخابرات والأمن القومي فميريكان صرح بللي ميريكان كتحقق فمسألة واش فيروس كورونا المستجد تصاوب مخبريا فالشينوا، وماجاش من سوق ديال لحم الحيوانات والحوت، أو لا.
وقال المسؤول بللي يقدر يكونو الشينوا دارو هذ الفيروس عن طريق الخطأ فالمختبرات، وهذي هي الفرضية اللي نطالقات منها المخابرات فالتحقيقات ديالها، لكن مازال ما قدرات تأكدها أو تنفيها، أو تعرف واش تقاص شخص فهذ المختبرات بالخطأ عا هذ النظرية أو تنفيها، ودابا مازال كتقلب.
والمخابرات فميريكان ما كتعتقدش واش يكون الفيروس مرتبط بالأسلحة البيولوجية، ومازالة كتراجع مجموعة من المعلومات الحساسة على الشينوا باش تقرر آش كاين.
والأربعاء، الرئيس الامريكي دونالد ترامب قال بللي ميريكان دايرة فحص دقيق على هذشي اللي وقع، فالوقت اللي صرحو مسؤولو إدارة ترامب بللي الشينوا هي سبب انتشار الفيروس، حيت مادارتش مجهودات كبيرة باش تحد هذ الانتشار.
وولبارح الثلاثاء، كشف مارك ميلي، رئيس الأركان المشتركة، بللي ميريكان بدات تقلب بشكل جدي على أصل الفيروس.