اتهم منظمة الصحة العالمية والشينوا.. مجلس الشيوخ كيحقق فأسباب انتشار فيروس كورونا فميريكان

ميريكان بدات كتشك فالشينوا وفمنظمة الصحة العالمية لا يكونو هوما اللي طلقو فيروس كورونا المستجد باش يديرو حرب بيولوجية، وبدات تحقق فهذ المسألة.
لجنة مجلس الشيوخ الأمريكي للأمن الداخلي والشؤون الحكومية فتحات تحقيق بخصوص ظهور فيروس كورونا المستجد، وكيفاش حتى انتشر بهذ الشكل الكبير فميريكان، و ركزات على الدور ديال الشينوا ومنظمة الصحة العالمية فهذشي.
وقال رئيس اللجنة، رون جونسون، اليوموالثلاث فمقابلة مع "بوليتيكو" بللي هو والزملاء ديالو بداو كيقلبو على ظروف انتشار الفيروس فميريكان وبرا ميريكان، وكيفاش بان الفيروس فالشينوا، وواش الجهود اللي دارت منظمة الصحة العالمية والشينوا كافية باش تحد من انتشارو أو أنها خلات هفوات بلعاني.
واكد بللي التحقيق اللي غايدار غايجاوب على مجموعة من الأسئلة، وخصوصا سؤال منين بدا هذشي وكيفاش انتقلات العدوى من الإنسان للحيوان، وواش كاينة حسن نية فتطوير أنواع أخرى من الفيروسات لمحاولة إيجاد لقاحات، وشنو دور منظمة الصحة فهذشي.
وقال بللي مكايناش الثقة فالشينوا حيت شيوعية، ومايمكنش ميريكان تدير الثقة فمنظمة الصحة العالمية حيت " كذبات علينا، ومنحازة للشينوا وكاتساعدها أكثر"، وفق تعبيرو.