واهذا هو الشطط فاستعمال السلطة بعينيه.. شرطة إقليم الباسك فرقات البروسيات على الجيران اللي صورو الشوهة اللي دارو بوليسها ملي تعداو على مغربي

واهذا هو الشطط فاستعمال السلطة بعينيه! شرطة إقليم الباسك، المعروفة ب لاإيرتزينسا ناضت تتفرق البروسيات الإدارية على الجيران اللي صورو الشوهة اللي دارو بوليسها ملي تعداو على شاب من أصل مغربي و مو حيت لقاوه خارج و معطاوهش الفرصة يشرح ليهم سبب تواجد ديالو بالزنقة.
جوج ديال الجيران اللي عاينو الواقعة و وثقوها بالصور توصلو ببروسيات لديورهم و اشعار بفتح تحقيق قضائي حيت زعما نشرو حادثة الإعتداء عبرو عن إستغرابهم من هادشي. وحدة من الجيران شرحات انها توصلات بجوج بروسيات و إستدعاء امام القضاء. التهمة هي سب و نشر صور السلطات و أعضاء من قوات الامن .
اما المتابعة القضائية غادي تكون بسبب السب و القذف مع التشهير!!! الجيران اشتكاو انهم تعرضو لحملة تحرش خلال كتر من اسبوع من طرف عناصر الشرطة الباسكية اللي جاو تحت من الشراجم و بالضبط فنفس بلاصة الواقعة و بداو تينيشو بالضو على الشراجم باش يعرفو مصدر تصوير الفيديو اللي فرشهم و بين سلوكاتهم الهمجية مع شاب مقدرش يدافع على راسو لأنه بكل بساطة عندو إعاقة ذهنية.
البوليس قالو للجيران المتضررين إيلا حسيتو كاين تحرش سيرو قدمو شكوى ضد البوليس!!! اما بخصوص الحادثة فمصلحة الأمن قالت انها فتحات تحقيق باش تعرف واش كاين عنف تجاه الشاب و الأم ديالو اللي تتعدى عليها البوليسي ملي حاولات تشرح ليه ان ولدها تيعاني من إعاقة ذهنية!
بزاف ديال الجمعيات الحقوقية رصدات تجاوزات خطيرة ديال عناصر الشرطة الإسبانية خلال فترة الحجر الصحي و نددت بشي تدخلات عنيفة اللي مكان عندها حتى شي ضرورة سوى استعراض العضلات و سخونية الراس!