شي وحدين كيقولو باللي “كوميسيرات” فقهوة “لاليگ” فكازا بالعلالي. شكلهم لا اسلوبهم لا هدرتهم كتخلي كلشي يشك باللي منتاحلين صفة وها علاش

البارح الاثنين 27 مارس 2018 مع السبعة لا روب العشية ناضت مطايفة بين لعيالات بجوج عندهم طونوبيلات قبالة مقهى ياسمين اللي كاينة فحديقة الجامعة العربية بشارع مولاي يوسف فكازا. لبنات تناتفو وهو يخرج واحد اربعيني قريب للخمسين من قهوى “لاليگ” اللي مقابلة مع ياسمين وكتوقع فنفس الشارع كيتفرج وهو يؤمر بوقاحة من واحد الشاب ما يصورش بالتلفون ديالو مشهد لمضاربة. الشاب رجع اللاور ودخل فمشاداة مع اخر على قضية التصوير.
هنا القضية عادية. غادية ما تبقاش باش خرجو شي وحدين من نفس القهوة التاحق بيهم واحد من القهوة اللي اونفاس ولابس دجاكيط ديال فصيل “وينرز” الودادي. هنا بداو كيقولو هادا راه كوميسير. قدموهم انهم بوليس. وسط كازا حدا ولاية الامن والناس كتنتاحل صفة “كوميسير”.
المشكلة لا شكلهم لا طريقة لباسهم لا طريقة كلامهم تخلي شي حد يصدقوهم ولكن مع دارو بحال شي جماعة كيخربقو اللي كيدورو بيه. حقاش كون كانو فالبوليس من غير الادب اللي ولاو والاحترام لبنادم من نهار جا المدير العام الجديد الحموشي٬ كاين الاسلوب ديال الهدرة اللي حقير بزاف. الكوميسرات ديال هاد الوقت فيهم ادب واحترام وكيتهلاو فلباسهم وشكلهم. هاد الشي ما عندش هاد خياتنا. ثم كون كانو فالبوليس ما غادينش يخليو لبنات يتناتفو وسط الشارع. ممكن ما يكونش اختصاصهم. ممكن ولكن يديرو اتصال يتحركو. اللا غير شافو جوج البوليس بالموطور وصلو وهما يدخلو للقهوة.
انتحال صفة حدا ولاية الامن بلا حيا بلا حشما
رابط الفيديو