في عالم مابعد كورونا الناس في العالم ماغاديش يقدرو يبدلو طوموبيلاتهم أو ديورهم أو بورطابلاتهم ولكن غادي يحتاجو يستهلكو الحشيش باش يحيدو الستريس هاعلاش ضروري المغرب خاصو يقنن زرع وإستهلاك الكيف

كنظن هادي الوقت المناسبة لي خاص يتم تقنين زرع وإستهلاك وتجارة الكيف والحشيش في المغرب، من بعد ماغادي نتغلبو على هاد الجايحة فراه باينة غادي تخلف إقتصاد متضرر بزاف، والبلاد غادا تكون محتاجة لأي درهم يدخل لخزينتها، وفي نفس الوقت المستهلكين في العالم غادي يكونوا محتاجين منتوج صحي وكيقاد المزاج ويخفف الظغط، لأنه غادي تدوز على العالم أيام كحلة الحشيش غادي تكون من بين النقط المضيئة القليلة في هادوك الأيام، راه مايمكنش لقطاع حيوي وفيه لفلوس ماتستافد منو الدولة بوالو وتبقى الأرباح ديالو حكر على العصابات والبزناسة، لي نهار تحتاجهم البلاد ماتقدرش حتى توقف عليهم بما أنهم كيخدموا خارج إطار القانون ومايمكنش نعتابروهم برجوازية وطنية.
من بعدا كورونا الى بقينا حيين الدول لي غادي تقدر تتعافى بسرعة من هاد الجايحة هي لي غادي تقدر تحرك الإقتصاد ديالها دغية وتنوعوا، والمغرب يمكن ليه يدير هادشي وتكون هادي فرصة ليه فين يجمع راسو ، حيت المغاربة كشعب والدولة بينوا بأنهم قادرين يمشيو بعيد ويكونوا أكفاء في خدمتهم ومحركهم الوحيد فهادشي هو حبهم لهاد البلاد والقيم ديال تامغرابيت لي ورثوها ولي ضيعوها سنوات ولكن دابا هي لي لقاو، وخاص الدولة تعرف تستعل هادشي وتزيد بهاد البلاد وتنظمها أكثر، راه حاليا ولاو عندها معطيات مفصلة على أي واحد وفي ظرف وجيز جمعاتهم، هادشي راه بيه تقدر تدير دراسات ومخططات لي يقدرو يخرجونا من هاد الكارثة رابحين.
في العالم ديال ما بعد كورونا الناس ماغاديش يحتاجو طوموبيلات وديور جداد وماغاديش يسافرو ويخسرو الفلوس غادي فقط يحاولو يعوضو الخسائر ديالهم وأكثر حاجة غادي يحتاجوها هي الحشيش باش تهدأهم وتعاونهم يدوزو هاد الأزمة بأقل الخسائر النفسية، ومايمكنش المغرب كبلد منتج ومحتاج للعملة الصعبة يخلي هاد القطاع في يد العصابات، هادي هي الفرصة فين خاص يتقنن الكيف ويتزرع على أوسع نطاق، طبعا ماشي أي أرض كيجي فيها ولكن على الأقل بعدا يرجع حتى لإقليم لعرايش وتاونات كامل وشوية من سيدي قاسم ووازان كامل، ويتم التصدير ديالو بشكل قانوني ويستافدو من العباد وتستافد الدولة.