سكوب. كيفاش دارت المعجزة المغربية بالارقام وبالفيديو: بحال الصين: بنينا صبيطار ميداني ف10 ايام. فيه 720 سرير صاوبوه 270 مغربي فاكثر من 45 الف ساعة خدمة: ايلى بغينا نقدرو نديرو كلشي – تصاور وفيديو

المغرب دار امور كبيرة مع هاد الجايحة. خرجات امور ايجابية تخلينا نشوفو المستقبل بامل اكبر. درنا معجزة يستحيل شي مغربي كان يتوقعها قبل كورونا فيروس. طلعنا صبيطار ميداني ف10 ايام. اييه بحالنا بحال الصين اللي ما عندنا لا قوتها لا امكانياتها لا فلوسها.
امكانيات مغربية خالصة. هاد الشي وقع فالمعرض الدولي حدا مسجد الحسن الثاني فكازا.
الاشغال بدات نهار 05 ابريل وسالات نهار 16 ابريل وتم التسليم نهار 18 ابريل لشركة "كازا للاسكان والتجهيز". حتى هي البارح الاحد 20 ابريل وجداتو باش يستقبل المرضى بعد ما تجهز بكل ما كيحتاجو صبيطار من اليات ومواد طبية. هادي اول دولة فافريقيا قدرات دير بحال هاد الانجاز.
كيفاش وصلنا لهاد الشي؟ كلشي دار بسرعة؟اللي خدمو هي شركة "بوبليك ايفانت" مع شي 15 شركة اخرى. هادو خدمو 24 ساعة على 24 ساعة ب3 الفرقات. كل وحدة كتخدم 8 سوايع. الصبيطار تبقى فوق گطار ونص وفيه 4 دالشابيطو كبار. 10 الاف متر مربع تصوبو ليهم حواجز باش يتقسمو. عطاونا 720 بيت كل غرفة دار فيها سرير. يعني يقدر يستقبل 720 مريض من اللي فيهم "كورونا فيروس". هاد الشي بدا بعد ما دار للارض لخشب والكاواتشو على هاديك لگطار ونص.
من بعد دار لاكليم وجابو التريسيانات يديو الضو. كاين 1200 بروجيكتور باش يضويو مزيان.
طبعا صبيطار ميداني خاصو كذلك الطواليطات اللي تصايب 50 وحدة مجهزات مزيان وكاين 50 دوش دار باش يستقبل مرضى كورونا فيروس وياخد بعين الاعتبار وضعيتهم وطبعا ما نساوش لكراسى. كاين الف كرسي.
هاد المعجزة المغربية شارك فيها 270 حرفي وتقني وفني مغربي خدمو 45300 ساعة دالخدمة. هادي معجزة مغربية