وصول الجيش للمدن راه غادي يزيد يخلي لمغاربة يرتاحو اكثر ويشعرو بالامن اكثر. هادي مزيانة بزاف لصورة الجيش ولصورة المغرب: من احسن الحروب ضد هاد العدو باش يحمي ارواح لمغاربة

وا استقبلو الجيش. عجبهم الحال. كاينين شي وحدين صورو فيديوات وشي وحدين كيرحبو بيهم. هاد الشي وقع هاد الصباح. ساعات قبل دخول حالة الطوارئ الصحية حيز التنفيذ هاد العشية ابتداء من الستة. كورونا فيروس خلات الجيش يخرج من القشلات. هاد الشي ايجابي ومهم. ايجابي كيبين باللي الدولة بكافة اجهزتها عندها دابا عدو واحد ووحيد. دخلات معاه فحرب ووظفات كاع امكانياتها باش ما يوصلش هاد العدو "كورونا فيروس" للمغاربة. ما يخلقش بؤر ليه عندنا.
المغربي دار ثقة كبيرة من نهار بدات الازمة فالدولة. كان قرارات تعطلنا باش ناخدوها. دابا مازال عندنا الوقت الكافي باش نوقفو هاد العدو. نحبسوه يدخل علينا.
الامن الوطني والجدارمية والقوات المساعدة ورجالات السلطة وبالاخص رجال الصحة من اطباء وفراملية وادارايين وشيفورات سيارات الاسعاف والبومبية دارو خدمة مزيانة. دارو كثر من خدمتهم. كيفوتو عدد الساعات اللي خاصهم يخدموها. هادي مهمة بزاف. دابا الجيش دخل باش يعاون. باش يساعد. باش يخفف على هادو.
الجيش ماشي غير عساكرية كيهزو السلاح. راه فيهم اطباء فيهم الفراملية فيهم اللي كيبني مستشفيات متنقلة...
هادي مزيانة للجيش لانها غادية تخلق ليه علاقة مع المواطن المغربي. مزيانة لصورة دولة كتخاف علي مواطنيها وكيدير كاع اللي تقدر عليه باش تحارب هاد العدو.
هاد الحرب خاصها ناس عندهم الخبرة فادارة المعارك. الجيش عندو الخطط باش يساعد شعبو فالدفاع عن ارواح لمغاربة. اصلا هاد الشي علاش كاين الجيش.