حتى شوهاتهم وشرداتهم وفيهم اللي انتاحر كَاع بسبابها.. صوفيا طالوني اعتذرات للمثليين: كنت بغيت الناس يتقبلو المثلية ويعرفو ان ناس قراب ليهم مثليين

المتحولة الجنسية صوفيا طالوني اعتذرات أخيرا على فعايلها، من بعد ما تسببات فمشاكل كبيرة لعشرات المثليين المغاربة مع عائلاتهم، وهذشي اللي خلى شي وحدين فيهم ينتاحرو، وبزاف منهم يتشردو، فهذ الفترة اللي كتعرف البلاد حالة طوارئ صحية بسباب فيروس كورونا المستجد.
المتحولة صوفيا حاولات تزوق الكلام، وقالت فتصريحها لمؤسسة تومسون رويترز، اليوم الأربعاء، بللي ماكانتش قاصدة تشوه المثليين وتفضحهم فالفيديو اللي هضرات فيه على التطبيقات اللي كيستخدموها، لكن بغات كلشي يعرف بللي موجودين، وممكن قراب من بزاف.
وتأسفات طالوني إلى كان هذاك الفيديو تسبب فأدى كبير للمثليين، وقالت بللي هي كانت بغات غير تدمج المثليين فالمجتمع وتقربهم من المجتمع اللي كيقصيهم، ويطبعو معاهم، ويحبسو الأفكار السلبية والصور النمطية عليهم، ويعتابروهوم ناس عاديين تماما بحال المغايرين.
المتحولة المثيرة للجدل لقات راسها مرغمة باش تحسن صورتها باش ما كان، واختارت الاعتذار بعدما سمعتها تقاصت دوليا وتشوهات بالمزيان، حيت مجموعة من الجمعيات الحقوقية استنكرات الفعل اللي دارت، ومنها هيومن رايتش ووتش وحركة مالي، وحتى الإعلام الدولي فضح واستنكر الأفعال ديالها اللي خرجات بيها على حياة بزاف دالناس ماعندهم حتى شي ذنب.
لو كانت طالوني فري بغات المجتمع المغربي يطبع مع المثليين ومزدوجي الميول والمتحولين، كان بإمكانها تدير فيديوهات هادفة تدافع فيها على قضية "الكوير"، وتطلب من الناس باش يتقبلوهم، ماشي تدير لايفات مع دراري وتفضح ميولهم الجنسي وتقول ليهم "مرحبا بيكم فنادي الشوهة والفضيحة"، أو تحرض الناس على دخول تطبيقات ديال التعارف خاصة بالمثليين وتحرضهم.
والشطاح عمرو ينسى هزة الكتف، هايا اعتذرات دابا، وباينة قريب منين يرجع ليها الكونط فأنستكَرام ترجع تشوه ثاني فأفراد مجتمع "الكوير".
وهذا رابط تصريح طالوني لمؤسسة تومسون رويترز:
https://news.trust.org/item/20200513160744-1v82p/