بعد فضيحة صوفيا طالوني وتشهيرها بالمثليين.. الحقوقية ابتسام لشكَر ل"كود": هذاك تحريض على الكراهية والعنف ضد الإنسان وخاص الدولة تلغي الفصل 489 اللي كيجرم المثلية

استنكرات الحقوقية ابتسام لشكَر، مؤسسة الحركة البديلة من أجل الحريات الفردية، هذشي اللي دارت المتحولة الجنسية صوفيا طالوني، من بعدم ما حرضات على مهاجمة المثليين والتشهير بهم من خلال فيديو لايف كشفات فيه على 3 ديال التطبيقات خاصة بيهم، الشيء اللي خلا شي متخلفين يحطو تصاورهم فالفايس ويسبوهم.
لشكَر، اللي تكلمات على صوفيا بصيغة المذكر، قالت فتصريحها ل"كود" بللي صوا اعتذرات أو لا "ميساجو كان واضح، وهذا كيدخل فإطار التحريض على العنف والكراهية ضد المثليين، حيت هو براسو عندو جهل باللي المثلية الجنسية أمر طبيعي، وعندو اضطراب ومافاهم والو".
وزادت: "باش يعطي السميات ديال التطبيقات ويهضر مع البنات باش يقول ليهم شوفو راه كلشي "لوبيا"، وكَاع الرجال مثليين، وراه كاين راجلك وخوك، فهذ لاميطود كتبان لي ديال النازية".
وكتشوف بللي بهذشي معاناة المثليين غاتولي كبر مع هذ الحجر الصحي، خصوصا بعدما خرجو تصاورهم وسمياتهم، وهوما كَالسين مع عائلاتهم فالدار وماكايخرجوش، وهذشي غايتسبب ليهم فمشاكل معاهم وغايتمارس عليهم العنف.
ومن غير هذشي، كتشوف الحقوقية بللي المثليين والمثليات محكَورين ديما فهذ المجتمع "وهذشي بسبب هوموفوبيا الدولة أولا، حيت هذ التحريض اللي وقع هذ الأيام والعنف والكراهية والاضطهاد ضد المثليين والمثليات راه كيوقع ديما أصلا، وكيخلف ضحايا كثار اللي كيوقعو ليهم مشاكل مع عائلاتهم، ومع الجيران، وفالخدمة والمدرسة، ويقدرو بسباب هذشي يتعرضو للعنف الجسدي، وهذشي خطير جدا"، على حساب كلامها.
وطالبات بضرورة إلغاء الفصل 489 من القانون الجنائي اللي كيجرم المثلية الجنسية، وقالت بللي ما يمكنش نتكلمو على حقوق الإنسان وننساو حقوق المثليين والمثليات، وخاص القانون يتبدل باش حتى العقليات تتبدل والهومو فوبيا ماتبقاش.
وتأسفات لهذشي اللي كوقع للمثليين و"حتى كيفاش كيتعاملو معاهم السلطات والبوليس، وكيفاش كيحقدو عليهم، فالوقت اللي هوما بشر عاديين وبحالنا كاملين عندهم حقوق وحريات ولازم على الدولة تضمن كرامتهم وتحترم حياتهم الخاصة، وحتى قبل ما يوقع هذشي يوميا المثليين كيتصلو بينا ويعاودو لينا على شنو كيعيشو، وراه كاينين هذ الشهر جلسات ديال محاكمة مثليين، وهذشي مؤلم"، كيف قالت.