واخا كاينة أزمة كورونا.. فهذ الموسم الغلة مزيانة والزراعات الربيعية والصيفية غتلبي الاحتياجات الاستهلاكية حتى لدجنبر 2020

طمأنات وزارة الفلاحة والصيد البحري والتنمية القروية والمياه والغابات المستهلكين فهذ الأزمة ديال فيروس كورونا المستجد بشأن المواد الزراعية، وأكدات بللي الإنتاج الفلاحي غيستمر بشكل عادي، والسوق غيتمون بكميات مزيانة، ومن المتوقع تغطي الزراعات الربيعية والصيفية كَاع الاحتياجات من يونيو حتى لدجنبر 2020.
وأكدات الوزارة، فبلاغ ليها توصلات بيه "كود"، بللي غيستمر التوزيع ديال الزراعات الربيعية بشكل طبيعي، بحيت تجاوزات نسبة الزراعات حتى لدابا 105 فالمية من البرنامج المحدد، مع تجاوز المساحات المبرمجة بالنسبة لبطاطا اللي وصلات ل 112 فالمية، وماطيشة ب127 فالمية، والبصلة ب106 فالمية، والكَرعة ل147 فالمية، واللوبيا الخضرا ل209 فالمية، بينما الزراعات الأخرى تجاوزات 90 فالمية من المساحة المبرمجة.
وزيادة على هذشي، غادي يتنفذ برنامج توزيع الزراعات المحدد بالنسبة للخضرة المهمة فالموسم الصيفي ابتداء من يونيو، فمساحة ديال 19 ألف هكتار.