الفايد والعشابة والمشعوذين مشاو فيها.. يوتوب قررات تسوبريمي كَاع المحتويات المتعلقة بكورونا اللي كتتعارض مع توجيهات منظمة الصحة العالمية

من دابا لفوق، موقع "يوتوب" ديال الفيديوات غدي يولي يسوبريمي كَاع المحتويات المتعلقة بفيروس كورونا المستجد، واللي كتتعارض بشكل مباشر مع النصائح والتوجيهات ديال منظمة الصحة العالمية، ومكيستندش على أدلة طبية.
وقالت الرئيسة التنفيذية ل"يوتوب"، فأول مقابل ليها ملي بان كورونا، لبارح الأربعاء، بللي بغات تقضي على الفايك نيوز والإشاعات اللي كتروج بخصصوص الفيروس، استنادة للخطة اللي متبعها شركة "كَوكَل" فهذ الصدد.
وتكلمات على أمثلة ديال الكلام اللي كيتقال وما عندوش أساس علمي بحال "خودو الخرقوم، خودو فيتامين سي، غادي نعالجوكم"، وقالت بللي هذشي انتهاك لسياسة الشركة وكذلك لتعليمات منظمة الصحة.
وتكلمات الرئيسة كذلك على حاجة خطيرة، حيت قالت بللي 75 فالمية ديال الطلب كاين على الأخبار غير الموثوقة، وعل هذشي الشركة تدخلات.
وحتى موقع التواصل الاجتماعي "فيسبوك" غادي فنفس الاتجاه، بحيث اللي شارك أي معلومات خاطأة على الفيروس غيتلقى تنبيه بضرورة زيارة موقع منظمة الصحة العالمية ويقرا التوجيهات ديالها.
وبالنسبة للناس اللي كيسيفطو بحال هذ الفايك نيوز مرات كثيرة، فيسبوك كيتدخل باش يحظرهم ومابقاوش يسيفطو حاجة خرى حتى تدوز مدة.