كولشي فهمو غلط وهو كان مطلعها على الجزائريين.. وادو دافع على محرز: هو كان غير ضاحك والسيد جانتلمان

عبد السلام وادو، لاعب المنتخب الوطني السابق دافع على الجزائري رياض محرز بعد تصريحاته الأخيرة فلايف كيتحدث فيه مع مواطنه إسماعيل بوعبد الله، الصحافي بقناة "بي إن سبورت" القطرية، اللي قال فيه بالضحك أن فوز المنتخب الجزائري كيفرح غير الجزائريين فقط وشوية التوانسة.. ولكن المغاربة والسينغاليين والكامرونيين ماكيفرحوش للدزاير فاش كتربح ماشي حيت ماكيبغيوهمش، ولكن حيت الجزائريين فيهم الصداع والغوات والهدرة بزاف، وكيرونو الدنيا لا ربحو، وعطى المثال بفاش كيربحو شنو كيوقع فبانام.
وادو نشر تغريدة على تويتر، دافع فيها على محرز، مشيرا إلى أن اللاعب الجزائري كان غير كايضحك ولم يقصد الإساءة إلى المغاربة "هادشي راني فسرتو لولاد بلادي. الجملة اللي گال كتخص كذلك حتى السنغاليين، وهو شخص طيب وجانتلمان".
عبد السلام وادو زاد تويت اخر، بارطاجا من خلالو تويت ديال محرز كيقول فيه: الام ديالي مغربية، ماكاين سوء تفاهم، حنا مجموعين، وزاد بالضحك: غير هو كنفلو فاش حنا اللي كنربحو
معروف بمواقفه النبيلة وصراحته، وهو حاليا ضمن الطاقم التقني للمنتخب الجزائري بإيعاز من المدرب جمال بلماضي.
وبزاف ديال الناس فهمو الفيديو غلط، وسحابلهم ان محرز سب المغاربة، ولا انه مكيحملهومش. واش حيت مافهموهش شنو قال، والسبب هنا اللغة، واش حيت بغاو يسمعو غير اللي بغاو.. مانعرفت. المهم نزلو على السيد هاد الباطل هكاك، وهو كان غير ضاحك وماقال حتى حاجة عيب.