مجموعة نسويات دارت مبادرات باش تدعم المثليين والترانس وتحارب العنصرية ضد الأفارقة جنوب الصحراء

دارت مجموعة "نسويات"، وهي مجموعة كتتكون من لنساء كوير وترانس، مبادرات كثيرة فهذ الفترة ديال الحجر الصحي اللي فرضو فيروس كورونا المستجد، باش تقدم مساعدات للأقليات الجنسية والجندية، وكذلك باش تعاون الأفارقة جنوب الصحراء اللي عايشين فالمغرب، واللي كيعانيو فهذ الفترة الحالية من التنمر والتمييز، بعد مقتل المواطن الأمريكي ذو الأصول الأفريقية فميريكان، جورج فلويد.
بالنسبة لمجتمع "الميم عين"، مجموعة "نسويات" دارت مبادرات مختلفة، أهمها مبادرة "واش عرفتي"، واللي هي حملة توعوية ف"السوشل ميديا"، باش تتم محاربة الصور النمطية الموجودة على هذ الفئة فالمغرب، خصوصا بعد حملات التشهير بهذ الفئة مؤخرا، واللي قادت الترانس صوفيا طالوني وحدة منها، وتسببات فانتحار وتشريد مجموعة من الناس، وغيتم استعمال جميع الوسائل التواصلية والفنية، واستخدام لغة سهلة، وغادي تستمر لمدة شهرين (شهر ماي ويونيو).
كاينين جوج حملات خرى طلقاتها "نسويات" لمساعدة "الكوير"، وهي حملة المساعدة النفسية، بحكم المشاكل النفسية اللي كتعاني منها هذ الفئة بسبب التهميش والرهاب من عائلاتهم ومحيطهم، ثم حملة خدمات استعجالية على قبل فيروس كورونا المستجد، واللي كتقدم من خلال ها المجموعة مساعدات مباشرة للأشخاص الكوير اللي تضررو من هذ الجائحة، سواء فالسكن أو الخدمة أو الأمور الأخرى.
بالنسبة للأفارقة جنوب الصحراء، "نسويات" دارت مبادرة "كوير مغاربة من أجل حياة السود"، من خلال تقديمهم لمعلومات بثلاث لغات للمغاربة باش مايبقاوش يتعاملو مع هذ الفئة بعنصرية، وكتتعلق بالتاريخ المناهض للسود فالمغرب، وكيفاش ممكن الفرد يوعي عائلتو على العنصرية ضد السود، وتجنب استعمال كلمات مناهضة ليهم، والجمعيات والفنانين اللي كيناضلو ضد العنصرية فالمغرب، بالإضافة لكون أن الحركات الكويرية عمرها تكون موجودة لو كان ماكانش نضال النسا الترانس ضد العنف البوليسي.